ИИВ ЙҲХББ ҳайдовчилик гувоҳномасини олиш учун топшириладиган назарий ва амалий имтиҳонлар тадбиркорлик субъектлари томонидан инсон омили чекланган, автоматлаштирилган автодромда ва имтиҳон олиш хоналарида ўтказилиши йўлга қўйилаётгани сабаб гувоҳнома олиш учун ўқиётган фуқароларни огоҳликка чақирди.
Маълум қилинишича, Вазирлар Маҳкамасининг 2021 йил 4 майдаги 272-сон қарорига мувофиқ, эндиликда ҳайдовчилик гувоҳномасини олиш учун топшириладиган назарий ва амалий имтиҳонлар тадбиркорлик субъектлари томонидан инсон омили чекланган, автоматлаштирилган автодромда ва имтиҳон олиш хоналарида ўтказилиши йўлга қўйилмоқда.
Ушбу тизим инсон омили тўлиқ чекланган, автоматлаштирилган дастур ёрдамида ҳайдовчиликка номзодларни ўқув муассасасига келиб кетишларини, дарсларда ва машғулотларда қатнашишларини, ички имтиҳонлардан ўтган ёки ўтмаганликларини тўлиқ назоратини амалга ошириб, якуний назарий ва амалий имтиҳонларга рухсат беради.
«Керакли малакага эга бўлмасдан, коррупцион йўллар орқали ҳайдовчилик гувоҳномасини олиш ҳақида ўйлаш эндиликда иложсиз ва нотўғри қарор эканлиги ҳақида огоҳлантирамиз», — дейилади хабарда.
Аввалроқ Бухорода танишлари орқали ҳайдовчилик гувоҳномаси олиб бериш учун 3 млн сўм пора олган автомактаб ўқитувчиси ушлангани тўғрисида хабар берилганди.
Изоҳ (0)