Samarqandda fuqarolarni 30 ming dollar evaziga Meksika orqali AQShga yubormoqchi bo‘lgan shaxslar ushlandi

Samarqand viloyatida fuqarolarni noqonuniy ravishda AQShga yubormoqchi bo‘lgan shaxslar qo‘lga olindi.

Davlat xavfsizlik xizmatining Samarqand viloyati bo‘yicha boshqarmasi hamda viloyat ichki ishlar boshqarmasi xodimlari tomonidan o‘tkazilgan tezkor tadbirda Samarqand tumanida yashovchi 2 nafar shaxs (1985 va 1991-yillarda tug‘ilgan) Samarqand shahrida istiqomat qiluvchi 2 fuqaroni AQShga yuborish uchun ularning har biridan 30 mingdan, jami 60 ming AQSh dollari talab qilib, oldindan 20 ming dollar olgan vaqtida ushlandi.

Aniqlanishicha, ularni O‘zbekiston—Turkiya—Boliviya—Kolumbiya—Meksika—AQSh yo‘nalishi orqali AQShga yuborish rejalashtirilgan.

Shuningdek, ularga yo‘lga chiqishdan avval PZR-test ma’lumotnomasiga va hisobida 4 ming AQSh dollari bo‘lgan Visa-kartaga ega bo‘lishlari kerakligi hamda har bir davlat hududida ularni kuzatib qo‘yuvchi shaxslarning talablarini, jumladan, Amazonka daryosining Kolumbiyadan oqib o‘tuvchi qismidan va Meksikaning o‘rmonlaridan o‘tib olish bo‘yicha talablarini bajarishlari zarurligi tushuntirilgan.

Bundan tashqari, tadbir davomida hibsga olingan shaxslarda 60 nafardan ortiq fuqarolarning pasport nusxalari borligi ham aniqlandi.

Hozirda mazkur holat yuzasidan Jinoyat kodeksining tegishli moddasiga asosan jinoyat ishi qo‘zg‘atilib, tergov harakatlari olib borilmoqda.