Аҳоли ва тадбиркорлик субъектларининг давлат хизматларидан фойдаланиш имкониятлари кенгайтирилиши муносабати билан ҳукуматнинг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисидаги Вазирлар Маҳкамаси қарори қабул қилинди.
Киритилган ўзгартишларга кўра, адвокатлик лицензиясини олишга оид аризалар адлия органлари томонидан 10 иш кунида кўриб чиқилади (илгари 20 иш куни эди).
Шунингдек, васийлик ва ҳомийлик қилишга тўсқинлик қилувчи жиноятларнинг аниқ рўйхати белгиланган (илгари қасддан содир этган жинояти учун ҳукм қилинганларнинг барчасига чеклов мавжуд эди).
Эндиликда тадбиркорликни рўйхатдан ўтказиш рад этилганидан 5 иш кунида қайта рўйхатдан ўтказиш учун мурожаат қилинса, давлат божи тўланмайди.
Тадбиркорликни рўйхатдан ўтказиш учун БҲМнинг 20 фоизи (54 минг сўм) миқдорида йиғим ундирилади (илгари БҲМнинг 1 баравари — 270 минг сўм миқдорида ундирилган).
Бундан ташқари, Ягона интерактив давлат хизматлари портал ариза берилганда ундириладиган йиғим миқдори 10 фоизга 48,6 минг сўмга арзонлашади. Юридик консультация билан шуғулланувчи юридик фирмаларни рўйхатдан ўтказиш соддалаштирилади. Адлия органлари рўйхатдан ўтаётган фирма томонидан тақдим этилган консултантлар тўғрисидаги ҳужжатларни уч кун ўрнига бир кунда кўриб чиқиши керак бўлади.
Давлат божи тўланганлиги учун қоғоз квитанцияни тақдим этиш бўйича хизматлар кўрсатиш талаби бекор қилинади. Шунингдек, бир қатор хизматларни олишда юридик шахснинг рўйхатдан ўтгани тўғрисидаги гувоҳнома нусхаси талаб қилинмайди.
Бир қатор давлат хизматларини кўрсатиш регламентига ногиронлиги бўлган, ижтимоий ҳимоя реестрида рўйхатга олинган шахслар давлат божи ва йиғимларини 50 фоизлик чегирма билан тўлаши қайд этилган тартиб қўшилган.
Аввалроқ Ўзбекистонда энди суғурта шартномаси электрон шаклда ҳам тузилиши мумкинлиги, Ўзбекистонда санаторийларда даволаниш учун йўлланма ДХМ ёки давлат хизматлари портали орқали берилиши тўғрисида хабар қилинганди.
Изоҳ (0)