Ўзбекистонда 2021 йилнинг ноябрь ойида аҳоли ўртасида автомобиль олди-сотдиси бўйича шартномалар сони октябрга қараганда 2,7 фоизга камайди. Бу ҳақда Иқтисодий тадқиқотлар ва ислоҳотлар маркази таҳлилларида сўз боради.
Унга кўра, 2021 йил ноябрь ойида республикада автомобиль олди-сотдиси бўйича битимлари сони фаолликнинг ўсиш тенденциясини сақлаб қолган. Шундай қилиб, 2021 йилнинг октябрь ойига қадар савдолар бироз пасайганига (2,7 фоиз) қарамай, сентябрь ойига нисбатан ўсиш 29 фоизни ташкил этган.
Шу билан бирга, 2020 йилнинг ноябрь ойига нисбатан маҳаллий автомобиль бозорига бўлган талаб ўртача 8,8 фоизга, 2019 йилнинг шу даврига нисбатан 18,2 фоизга кескин ўсиш кузатилган.
Марказ маълумотларига кўра, 2021 йил январь—ноябрь ойларида 7,8 триллион сўм автокредитлар берилган. Бу 2020 йилдаги кўрсаткичга нисбатан 40 фоизга ошган (2020 йилда 5,6 триллион сўм). Ҳудудлар кесимида асосий ўсиш Бухоро вилояти (114 фоиз) ва Тошкент шаҳрига (2,4 марта) тўғри келмоқда.
Таъкидланишича, бирламчи автомобиль бозорида чиплар билан боғлиқ вазият қийинлигича қолмоқда. Микрочипларнинг етишмаслиги, унинг оқибатларида машиналар етишмовчилиги ва ускуналарнинг ўзгаришини келтириб чиқаради. Шу билан бирга, янги автомобиллар сегменти ортидан иккиламчи бозорда нархлар ошиб боряпти.
Ҳудудлар кесимида энг юқори ўсиш суръатлари Қашқадарё (12,1 фоиз), Хоразм (10,5 фоиз) вилоятлари ва Қорақалпоғистонда (6,3 фоиз) қайд этилган. Наманган (17,1 фоиз), Фарғона (14,9 фоиз), Сурхондарё (14,4 фоиз) ва Навоий (10 фоиз) вилоятларида автомобиллар хариди камайган.
2021 йил ноябрь ойида 17,4 минг дона янги енгил автомобиллар давлат рўйхатидан ўтказилган (октябрь ойига нисбатан камайиш – 5,9 фоиз). Шундан, 1 270 донаси (7,3 фоизи) чет элда ишлаб чиқарилган автомобиллар ҳисобланади.
Умуман, январь—ноябрь ойларида республика бўйича 169,7 минг дона янги енгил автомобиллар давлат рўйхатидан ўтказилган.
Аввалроқ Ўзбекистон 11 ойда хориждан 503 млн долларлик автомобиль импорт қилгани тўғрисида хабар берилганди.
Изоҳ (0)