Россиянинг Ўзбекистондаги элчиси Олег Малгинов Ўзбекистонда атом электростанциясини (АЭС) қуриш лойиҳаси ҳозирда қайси босқичда эканини маълум қилди, деб хабар беради «Подробно». Унинг сўзларига кўра, мазкур лойиҳага тўсқинлик кўратаётган давлатлар бор.
«АЭС масаласи президентлар томонидан қўйилган. Улар ушбу лойиҳани амалга ошириш мақсадини қўйган ҳолда ишлаб чиқиш жараёнига старт берган. Ҳозирда мазкур жараён мутахассислар даражасида жуда интенсив кетмоқда. Бу ерда қатор техник масалалар юзага келди. Аввалига режа битта реактор учун эди, аммо олимларнинг маълум фикрлари юзага келди. Ўзбекистонда доим ҳам сув етарли эмаслиги сабаб бошқа турдаги реактордан фойдаланиш таклиф этилди. Ушбу масала, умуман олганда муҳокама қилинмоқда», — дейди элчи.
Унинг сўзларига кўра, техник ва жойлаштириш нуқтаи назаридан маълум қийинчиликлар мавжуд, бироқ улар ҳал этилмоқда.
«Албатта, бу лойиҳага бошқа бир қатор давлатларнинг ёндашувлари нуқтаи назаридан ҳам қийинчиликлар мавжуд. Атом электр станциялари қурилаётган бошқа мамлакатларда ҳам Россиянинг бундай йирик лойиҳаларни амалга оширишига тўсқинлик қилувчи таъсирлар мавжуд. Бу ерда ҳам шундай қилишга уринишмоқда», — дея таъкидлаган Малгинов.
«Биз Ўзбекистонда АЭС қурилишидан хавотирга тушиб, бунга қарши чиқаётган қўшни мамлакатлар борлигини биламиз, аммо уларнинг ўзи учта станцияга буюртма берган. Агарда улар тезроқ қурилишни бошлаб ва уни якунласа, айнан улар минтақада электр энергия билан савдо қилишни бошлайди. Рақобат бор, шу сабабли энг муҳими — кеч қолмаслик. Албатта, ҳаммасини ҳисобга олиш керак, аммо кеч қолиш ҳам керакмас. Ўйлайманки, икки мамлакат сиёсатчилари буни билади», — дейди россиялик дипломат.
Шунингдек, у мазкур лойиҳа олдинга силжишини, аммо ҳозир шошиш керакмаслиги, масала экспоэртлар ва раҳбарият даражасида ҳал этилишини қўшимча қилган.
«Энг муҳими лойиҳа Ўзбекистонга маъқул ва кенг жамоатчилик томонидан қабул қилиниши. Бу ерда ҳозирда бирлик йўқ. Менга тез-тез Ўзбекистон АЭС қуриб, Россияга қарам бўлиб қолиши, қарзи кўпайиши ҳақида гапиришади. Мен буларнинг барчаси реал асосга эга бўлмаган қўрқинчли ҳикоялар экани, чунки АЭС ҳар қандай қийматда ҳам ўз самарасини беради, тез эмас, лекин шундай бўлишини айтаман», — дейди Малгинов.
Эслатиб ўтамиз, 2019 йилда «Росатом» раҳбари Ўзбекистонда АЭС бўлишининг иқтисодий фойдаси ҳақида гапирганди. Унинг айтишича, АЭСга инвестиция қилинган ҳар бир доллар маҳаллий етказиб берувчиларга 1,9 доллар, мамлакатнинг ялпи ички маҳсулотига 4,3 доллар ва солиқ тушумлари шаклида бюджетга 1,4 доллар даромад келтириши мумкин.
«2019—2029 йилларда Ўзбекистон Республикада атом энергетикасини ривожлантириш концепциясини тасдиқлаш тўғрисида»ги Президент қарорига кўра, Ўзбекистон атом электр станцияси қурилишини 2022 йилдан эрта бошламайди.
Ҳужжатга кўра, мамлакатдаги илк атом электр станциясини барпо этиш уч босқичда амалга оширилади. Биринчи босқич — 2019—2020 йилларда АЭС қуриладиган жой аниқланади, 2020—2021 йилларда лойиҳанинг техник-иқтисодий асосини ишлаб чиқиш режалаштирилмоқда. 2022 йилдан эса объект қурилишига киришилади.
Россия дизайни асосида қуриладиган ушбу АЭС қиймати тахминан 11 миллиард долларга баҳоланган.
Изоҳ (0)