Ташқи меҳнат миграцияси агентлиги ижтимоий тармоқларда Россиядаги меҳнат муҳожирларига бир марталик ёрдам пули берилиши тўғрисида тарқалган хабарларга муносабат билдирди.
Таъкидланишича, сўнгги вақтларда Ташқи меҳнат миграцияси агентлиги номидан ижтимоий тармоқларда фуқароларни турли сохта хабарлар билан чалғитиш, ҳатто маълум миқдордаги тўлов эвазига моддий ёрдам беришни ваъда қилаётган ҳолатлар учрамоқда.
Хусусан, президент қарори билан фуқароларга 132 доллар миқдорида бир марталик ёрдам пули берилаётгани, зарур озиқ-овқат ва гигиена воситаларини сотиб олиш учун хорижда меҳнат қилаётган фуқароларга БҲМнинг 3 баравари (132 доллар) миқдорида бир марталик ёрдам ажратиш тизими мавжудлиги, ушбу ёрдам пулини олиш 4049 нафар киши мурожаат қилгани ва шулардан 3971 нафарига ёрдам кўрсатилгани тўғрисида хабарлар тарқалган.
Агентлик моддий ёрдам сўраб қайси платформа орқали мурожаат қилиш мумкинлигини эслатиб ўтган. «Хорижда оғир аҳволга тушиб қолган меҳнат мигрантлари моддий ёрдам сўраб фақат ‘Биргамиз’ платформаси орқали мурожаат қилиши мумкин. Моддий ёрдам олиш учун ҳеч қандай тўлов талаб этилмайди», — дейилади муносабатда.
Аввалроқ Ўзбекистонлик меҳнат мигрантларига ёрдам беришга мўлжалланган Telegram-бот ишга туширилгани, Россияда қийин аҳволда қолган 9 нафар ўзбекистонлик чартер рейс билан бепул ватанга қайтарилгани тўғрисида хабар берилганди.
Изоҳ (0)