Тошкент шаҳар Чилонзор туманида жойлашган бир нечта масжидларда ўғрилик қилган шахс қўлга олингани хабар қилинганди. Олий суд матбуот котиби унга нисбатан суд ҳукми ўқилганини маълум қилди.
Маълум қилинишича, номаълум шахс октябрь—ноябрь ойларида «Новза», Қозиробот», «Убай ибн Каъб» масжидларида фуқароларнинг қўл телефони ва пулларини ўғирлаган. Жабрланганлар Ички ишлар органига мурожаат қилиб, йўқотганларини ундириб беришни сўраган.
«Хуфтон намози пайти бўлган. Одатдагидек намоз ўқиш учун жамоат олдига чиққанман. Қайтиб хонага кирган маҳалимда стол устида телефоним йўқлиги маълум бўлди. Масжиддаги кузатув камералари орқали текширганимизда бу йигит шу хонага кириб чиққани аниқланди», — деган «Убай ибн Каъб» масжиди имом ноиби.
Кузатув камералари орқали жиноятчи топилганда у муқаддам уч марта судланган хавфли рецидивист (1994 йилда туғилган) экани маълум бўлган.
У Жиноят кодексининг 169-моддаси (ўғрилик) 3-қисми «а» бандида кўрсатилган жиноятда айбли деб топилиб, 6 йилга, аввал тайинланган жазонинг ўталмай қолган қисми қўшилиб, узил-кесил 7 йилга озодликдан маҳрум қилинган. Жазо қаттиқ тартибли колонияда ўталиши белгиланган.
Изоҳ (0)