Буюк Британиянинг Metito Utilities Limited компанияси «Наманган шаҳар оқова сув тозалаш иншоотини давлат-хусусий шериклик шартлари асосида қуриш» лойиҳаси бўйича тендерда ғолибликни қўлга киритди, деб хабар беради Молия вазирлиги матбуот хизмати.
Мазкур лойиҳа Ўзбекистон президентининг 2018 йил 30 ноябрдаги «Ўзбекистон Республикасида ичимлик суви таъминоти ва канализация тизимларини ривожлантириш бўйича қўшимча чора-тадбирлар тўғрисида»ги 4040-сонли қарорига мувофиқ Осиё тараққиёти банки кўмагида Уй-жой коммунал хизмат кўрсатиш вазирлиги, «Ўзсувтаъминот» АЖ ҳамда Давлат-хусусий шерикликни ривожлантириш агентлиги томонидан амалга оширилмоқда.
Лойиҳа бўйича 2 босқичли очиқ ва шаффоф тендер жараёнлари ўтказилган. 1-босқичда лойиҳага қизиқиш билдирган 23 та хориж компанияга дастлабки малакани баҳолаш (RFQ) шартлари юборилган. Тендер жараёнининг 2-босқичида Буюк Британиянинг Metito Utilities Limited компанияси ҳамда Нидерландиянинг Almar Water Solutions BV консорсиум компанияси иштирок этган.
Молиявий таклифлар бўйича йиллик эркин фойдаланганлик учун тўлов бўйича Metito Utilities Limited компанияси томонидан 97,5 миллиард сўм ва Нидерландия давлатининг Almar Water Solutions BV консорсиум компанияси томонидан 103,1 миллиард сўм таклифи билдирган.
20 декабрь куни мазкур лойиҳа бўйича идоралараро тендер комиссияси томонидан Metito Utilities Limited компанияси молиявий таклифлар бўйича йиллик эркин фойдаланганлик учун тўловнинг энг паст нархини, яъни йиллик тўлов 9 миллион долларни таклиф этган ва халқаро тендер ғолиби деб топилган.
Лойиҳа доирасида қуввати суткасига 100 минг метр куб оқова сувларини тозалашга мўлжалланган иншоотни ва 7,5 километр узунликдаги оқова сув тармоқларини қуриш назарда тутилган.
Аввалроқ Тошкент шаҳрининг иссиқлик таъминоти бошқаруви 30 йилга Франциянинг Veolia компаниясига берилгани, Сурхондарёда аҳолини тоза ичимлик суви билан таъминлайдиган йирик лойиҳа бошлангани тўғрисида хабар берилганди.
Изоҳ (0)