Ижтимоий тармоқларда Тошкент шаҳар Чилонзор тумани 38-оилавий поликлиникаси ҳамширасининг ўз ҳисобидан Қизил ярим ой жамиятига пул ўтказишга розилик билдириб ёзган аризаси акс этган сурат тарқалди. Соғлиқни сақлаш вазирлиги ҳолатга муносабат билдирди.
Ўзини Э.Т. деб таништирган ҳамшира поликлиника бош шифокори Н.С. номига ёзган аризасида «Менинг декабрь ойи иш ҳақимдан 1 фоизини Қизил ярим ой жамияти фондига ўтказишингизга розиман», — дея қайд этган. Хат сўнгида 22 декабрь сана сифатида кўрсатилиб, имзо чекилган.
Соғлиқни сақлаш вазирлиги ҳолат юзасидан ўрганиш ишлари олиб борилаётганини маълум қилди. Қайд этилишича, вазият нима сабабдан юз бергани аниқлаштирилиб, камчиликка йўл қўйган масъулларга нисбатан тегишли жазо чоралари кўрилиши таъминланади.
«Соҳада меҳнат қонунчилиги талаблари бузилишига, ходимларнинг иш ҳақидан асоссиз ва мажбурий тарзда турли ушланмалар ушланишига йўл қўйилмайди», — дейилади ССВ муносабатида.
Соғлиқни сақлаш вазирлиги коррупцион ҳолатлар ҳамда ноқонуний хатти-ҳаракатларнинг ҳар қандай кўринишига нисбатан муросасиз муносабатда бўлиши айтиб ўтилган.
Изоҳ (0)