АҚШда коронавирусга қарши эмланишни истамаган 66 нафар денгиз пиёдаси хизматдан бўшатилди

АҚШ Денгиз пиёдаси корпуси ўтган ҳафта коронавирусга қарши вакцина олишни истамаган 66 нафар пиёдани хизматдан бўшатиб юборди. Бу ҳақда ABC News телеканалига таяниб, «Интерфакс» хабар берди.

«Касалликнинг одамлар орасида тарқалиш тезлиги денгиз пиёдаларимиз ва Денгиз пиёдаси корпусининг миссияси учун хавфни оширади», — дейилади АҚШ Ҳарбий денгиз кучларининг баёнотида.

Денгиз пиёдаси корпуси, шунингдек, диний сабабларга кўра вакцинациядан озод этиш борасидаги барча илтимосларни рад этган.

Денгиз пиёдаларининг вакцинация даражаси АҚШ ҳарбий хизматчилари орасида энг паст кўрсаткичга эга. АҚШ Ҳарбий денгиз флоти, Ҳарбий денгиз кучлари ва армиясидаги 98 фоиз ҳарбий хизматчи вакцинанинг ҳеч бўлмаганда бир дозасини олган.

Аввалроқ АҚШ разведкасининг минглаб ходимлари эмланишдан бош тортгани учун ишдан бўшатилиши мумкинлиги тўғрисида хабар берилганди.

Эслатиб ўтамиз, 1 ноябрь куни Нью-Йорк шаҳрида 10 000 дан ортиқ полиция, ўт ўчирувчилар ва бошқа ходимлар шаҳар мерининг барча шаҳар ишчиларини COVID-19 га қарши эмлаш бўйича топшириғига риоя қилмагани учун ҳақ тўланмайдиган таътилга жўнатилганди. Нью-Йоркдаги 2,3 мингга яқин ўт ўчирувчи эмланишни истамаётгани учун касаллик таътилига чиққан. Ходимлар етишмовчилиги туфайли шаҳардаги 18 та ўт ўчириш станцияси ёпилган.