Жаҳон банки (ЖБ) Тожикистондаги Нурек ГЭСни модернизация қилиш лойиҳасининг иккинчи босқичини молиялаштириш учун 65 миллион доллар миқдорида қўшимча грант ажратилишини маъқуллади.
«Мамлакат энергетика тизимининг асоси бўлмиш Нурек ГЭСга сармоя киритиш мамлакат ичидаги аҳоли хонадонлари ва корхоналарни барқарор ва ишончли электр энергияси билан таъминлаш, шунингдек, минтақавий бозорда экспорт тушумларини ошириш учун зарур», — деди Жаҳон банкининг Республикадаги доимий вакили Озан Севимли.
Жаҳон банки (225,7 миллион доллар), Осиё инфратузилма инвестиция банки (60 миллион доллар) ва Евросиё тараққиёт банки (40 миллион доллар) томонидан молиялаштирилган Нурек ГЭСни модернизация қилиш лойиҳасининг биринчи босқичи 2019 йилнинг март ойида бошланган эди. Лойиҳани амалга ошириш муддати — 5 йил (2023 йилгача). Шу вақт ичида ГЭСнинг 9 та гидроагрегатидан учтаси ва инфратузилманинг асосий компонентлари модернизация қилинади, ишлаб чиқарилган электр энергиясини узатишда фойдаланиладиган 6 та автотрансформатор алмаштирилади, объектни сейсмик фаоллик, сув тошқини ва бошқалардан муҳофазалаш мақсадида тўғон хавфсизлиги оширилади.
Жаҳон банки томонидан илгари 50 миллион доллар ажратилган лойиҳанинг иккинчи босқичи доирасида қолган 6 та ГЭС, Нурек кўприги реконструкция қилинади, ГЭСдан фойдаланиш ва техник хизмат кўрсатиш самарадорлигини ошириш бўйича бошқа чора-тадбирлар амалга оширилади. Лойиҳа 2024—2028 йиллар давомида амалга оширилади, дейилади хабарда.
Қайд этилишича, қўшимча 65 миллион доллар 164 миллион долларлик 2-босқични молиялаштиришдаги бўшлиқни тўлдиради. Қолган камомад қўшма молиялаштиришнинг бошқа потенциал манбалари, шу жумладан, 1-босқичдаги жамғармаларни қайта тақсимлаш ҳисобига қопланиши кутилмоқда. Шундай қилиб, Жаҳон банки томонидан лойиҳага киритилган инвестицияларнинг умумий ҳажми 341 миллион долларни ташкил этади.
Нурак ГЭС 1972—1979 йилларда ишга туширилган, у ҳозирда Тожикистондаги электр энергиясига бўлган йиллик эҳтиёжнинг қарийб 50 фоизини таъминлаб, экспорт қилинадиган электрнинг катта қисмини етказиб бермоқда. Бу Ўрта Осиёдаги энг йирик ГЭС бўлиб, унинг 300 метрлик тош тўғони баландлиги бўйича дунёда иккинчи ўринда туради. Ускуналар эскиргани сабабли станция ўз лойиҳавий қувватининг бор-йўғи 2320 МВтдан фойдаланмоқда, бу эса барча 9 блокнинг ишлашини ҳисобга олган ҳолда 3000 МВтни ташкил этади. Модернизациядан сўнг станция қуввати 3210 МВтга етказилиши кутилмоқда.
Изоҳ (0)