Путин: «Зеленский Украина халқининг тинчлик ҳақидаги сўровига жавоб бермаяпти, у ‘радикал унсурлар’ таъсирига тушиб қолган»

Украина президенти Владимир Зеленский халқининг тинчлик ҳақидаги сўровига жавоб бермаяпти, у «радикал унсурлар» таъсирига тушиб қолган. Бу ҳақда Россия президенти Владимир Путин 23 декабрь куни ўтказган йиллик матбуот анжуманида Россия—Украина зиддиятлари ҳақидаги саволга жавоб бериш мобайнида айтиб ўтди.

Путин Украина раҳбариятини Донбассдаги можарони тинч йўл билан ҳал қилиш учун қабул қилинган Минск келишувларини бажаришдан ҳамда ўзини республика деб эълон қилган ДХР ва ЛХР (Донецк ва Луганск Халқ Республикалари) етакчилари билан музокара қилишдан бош тортишда айблади.

«Энди улар билан гаплашишдан бош тортишмоқда, уларни террорчи деб эълон қилишмоқда. Бунинг сабабини тушунтироласизми? Чунки президент Зеленский халқнинг тинчлик ҳақидаги сўровига жавоб бериш ўрнига ҳокимият тепасига келиб, аввалги раҳбарлар каби радикал унсурлар таъсирига тушиб қолди. Уларни Украинада ‘натциклар’ (экстремистик миллатчи гуруҳ аъзолари) дейишади», — таъкидлади Путин.

У, шунингдек, Россия Украинага ҳужум қилишни режалаштираётгани ҳақидаги хабарларга изоҳ берди: «Бизнинг ҳаракатларимиз ўз хавфсизлигимизни таъминлаш заруратига боғлиқ бўлади. НАТОнинг Шарққа томон янада кенгайиши номақбул эканини аниқ қилиб айтганмиз».

Путиннинг қўшимча қилишича, Ғарб давлатлари 1990 йилларда НАТОни Шарққа томон кенгайтирмаслик ҳақида ваъда беришда Россияни «алдаган». «Алдашди. НАТОни бешта тўлқинда кенгайиши — очиқдан очиқ ғирромлик», — деди у.

Россия қўшинларининг Украина билан чегарада тўпланаётгани ҳақида маълумотлар 2021 йилнинг кузида пайдо бўлишни бошлади. Ғарб ОАВ манбаларига кўра, Украинага ҳужумда 100-175 минг россиялик аскар иштирок этиши мумкин. Кремль бу хабарларни «қуруқ, асоссиз ҳолда кескинликни кучайтириш» деб атади. АҚШ расмийларининг фикрича, Россия президенти Владимир Путин Украинага бостириб кириш тўғрисида ҳали қарор қабул қилмаган.

Бу орада Европада хавфсизлик кафолатлари бўйича музокаралар бошланди. Россия Ташқи ишлар вазирлиги АҚШ ва НАТО билан келишув лойиҳаларини эълон қилди. Россия томони бошқа нарсалар қатори НАТОга Украинани альянсга қўшилишдан четлаштиришни, шунингдек, Шарқий Европа ва Марказий Осиёда ҳар қандай ҳарбий фаолиятдан воз кечишни таклиф қилди. АҚШ Россиянинг таклифларини кўриб чиққанини, аммо Европа давлатларининг иштирокисиз уларни муҳокама қилмоқчи эмаслигини маълум қилди.