Академик Темурбек Усмонов 22 декабрь куни 79 ёшида ва академик Толиб Мўминов 78 ёшида вафот этди, деб хабар берди Ўзбекистон Фанлар академияси.
Маълумот учун, Темурбек Усмонов 1942 йилда Тошкент шаҳрида туғилган. 1967 йили Москва давлат университетини тугатиб, Ўзбекистон Фанлар академиясининг Ядро физикаси институтида стажёр-тадқиқотчи сифатида иш бошлаган.
Академик Темурбек Усмонов 2017 йилда Фанлар академиясининг ҳақиқий аъзоси этиб сайланган. Ўзбекистонда лазер физикаси ва технологиялари, ночизиқли оптика ва спектроскопия соҳаларининг долзарб масалаларини тадқиқ этиш, юқори малакали кадрлар тайёрлашга муносиб ҳисса қўшган.
У ўз соҳаси бўйича янги илмий йўналишга асос солиб, дунёда илк бор қувватли лазер нурланишларининг энг катта самарадорликдаги гармоникалари ва ёруғликнинг энг юқори даражадаги параметрик генерацияларини олишга эришган.
Шунингдек, академик «Фидокорона хизматлари учун» ордени билан мукофотланган эди.
Олим 400 дан ортиқ илмий мақолалар, 4 та монография, 16 та патент муаллифи ҳисобланади. 150 дан зиёд илмий мақолалари халқаро нуфузли журналларда чоп этилган.
Толиб Мўминов эса 1943 йил 10 январда Самарқанд шаҳрида туғилган. Самарқанд давлат университетининг физика факультетида таҳсил олган.
1992–1995 йиллари Самарқанд давлат университети ректори лавозимида фаолият кўрсатган.
200 дан ортиқ илмий ишлари чоп қилинган. 22 номзодлик ва 3 докторлик диссертацияларига раҳбарлик қилган.
Абу Райҳон Беруний номидаги давлат мукофоти, «Шуҳрат» ордени билан тақдирланган.
Бундан аввал Ўзбекистон халқ артисти, таниқли композитор Шермат Ёрматов, Андижон вилоятининг собиқ ҳокими Сайдулло Бегалиев ҳамда Шароф Рашидовнинг қизи Светлана Рашидова вафот этгани ҳақида хабар берилганди.
Изоҳ (0)