Тошкент метросининг «Космонавтлар» бекатида поезд вагони ёнгани ҳақида тарқалган хабар юзасидан расмий маълумот берилди.
«Тошкент метрополитени» матбуот хизмати хабарига кўра, 23 декабрь куни соат 12:10 лар атрофида ушбу бекатда 34-сонли ҳаракат таркибида машинист томонидан носозлик аниқланди. Шу сабабли, бекатда йўловчилар вагондан туширилиб, хавфсизлик чоралари кўрилди.
Фавқулодда вазиятлар вазирлигининг маълум қилишича, «Космонавтлар» метро бекати ичида ҳаракатланиб кетаётган 4 та вагондан иборат таркибнинг 3-вагонида техник сабабларга кўра сақлагич (предохранител) куйганлиги ёки тормоз колодкаси сиқиб қолгани тахмин қилинмоқда.
Воқеа жойида ҳеч қандай ёнғин содир бўлмаган. Носоз вагон таъмирлаш учун ДЕПОга юборилган.
Фуқаролар хавфсиз жойга эвакуация қилинган, ҳодиса оқибатида жабрланган ва ҳалок бўлганлар йўқ.
Воқеа жойига шаҳар ҳамда туман ФВБ раҳбар ходимлари ва 2 та ёнғин-қутқарув экипажлари жалб этилган. Ҳозирда вазият оқибатлари бартараф этилган, метро одатий иш режимида ишламоқда.
Изоҳ (0)