Исроил ҳукумати коронавируснинг тез тарқалаётган янги «омикрон» штаммига қарши курашиш учун 60 ёшдан ошган фуқароларнинг барчасига вакцинанинг тўртинчи дозасини олишни тавсия қилди. Бу ҳақда мамлакат Соғлиқни сақлаш вазирлигига таяниб, «Коммерсантъ» хабар берди.
Қайд этилишича, вакцинанинг тўртинчи дозасини учинчи дозадан тўрт ой ўтгач қабул қилиш мумкин. Исроилда иккинчи ва учинчи дозаларни олиш оралиғи беш ойдан уч ойгача қисқартирилган.
Исроил бош вазири Нафтали Беннетт фуқароларни имкон қадар тезроқ эмланишга чақирди. У Исроил дунёда биринчи бўлиб фуқароларига вакцинанинг учинчи дозасини бера бошлаганини таъкидлаб ўтди.
«Бу жуда яхши янгилик, вақтни беҳуда сарфламанг ва бориб эмланинг», — деди Беннет The Jerusalem Post билан суҳбатда. Исроил бош вазирининг фикрича, вакцинанинг тўртинчи дозаси «дунёни қамраб олган ‘омикрон’ тўлқинини енгишга» ёрдам беради.
Исроилда 60 ёшдан ошган инсонлар учун бустер инъекциялар 2021 йилнинг июль ойи охиридан берила бошлаганди. Кейинроқ 16 ёшдан ошган фуқароларга вакцинанинг иккинчи дозасини олгандан беш ой ўтиб, учинчи доза билан эмланишга рухсат берилди.
Ўтган бир суткада Исроилда «омикрон» штамми билан касалланиш бўйича 150 дан ортиқ янги ҳолати қайд этилди. Соғлиқни сақлаш вазирлиги маълумотларига кўра, 20 декабрь, якшанба куни мамлакатда икки ой ичида биринчи марта коронавирус билан касалланганларнинг кунлик сони 1000 кишидан ошган.
Эслатиб ўтамиз, Исроил «омикрон» штаммининг тарқалишининг олдини олиш мақсадида дунёда биринч бўлиб чет эл фуқаролари учун 2 ҳафтага ўз чегараларини ёпиб қўйганди.
Изоҳ (0)