Германияда коронавируснинг «омикрон» штаммига чалинган одамлар орасида биринчи ўлим қайд этилди, деб ёзади Reuters. Роберт Кох институти маълумотларига кўра, бемор 60—79 ёш орасида бўлган.
Хабарга кўра, Германияда яна 810 кишида «омикрон» штамми аниқланган, мамлакатда коронавируснинг ушбу турини юқтирганларнинг умумий сони 3198 кишига етган.
20 декабрдан Германия «омикрон» штамми туфайли британияликларнинг мамлакатга киришини чеклаганди.
Аввалроқ Борис Жонсон Британияда «омикрон» штамми билан касалланган бемор вафот этганини маълум қилганди. Шунингдек, АҚШда ҳам «омикрон» билан боғлиқ биринчи ўлим ҳолати қайд этилган.
Жаҳон соғлиқни сақлаш ташкилотининг (ЖССТ) ҳафталик ҳисоботига кўра, «омикрон» штамми дунёнинг 106 та давлатида аниқланган.
Коронавируснинг янги «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
Изоҳ (0)