TikTok қисқа видеороликлар домени — TikTok.com 2021 йилда дунёда энг кўп ташриф буюрилган веб-сайтга айланди ва ўтган йилги етакчи Google’ни ортда қолдирди. Бу ҳақда интернет-трафикни кузатиб борувчи Cloudfare маълумотларида айтилган.

TikTok биринчи марта февраль ойида Cloudfare иштирокчилари рейтингида энг юқорига кўтарилган бўлса, август ойидан бери деярли мунтазам равишда биринчи ўринни эгаллаб турибди. 2020 йилда дастур домени оммабоплик бўйича еттинчи ўринда эди.

Бу йил энг кўп ташриф буюрилган доменлар рўйхатида учинчи ўринни Facebook.com эгаллади. Ундан кейинги ўринларда Microsoft.com, Apple.com, Amazon.com, Netflix.com, YouTube.com ва Twitter.com. WhatsApp.com кучли ўнталикни якунлади.

Рейтингни тузишда Cloudfare веб-сайтга ташрифлар билан бирга, ижтимоий тармоқ ёки сервиснинг дастури ҳақидаги маълумотларни ҳам ҳисобга олди, дейилади компания хабарида.

TikTok қисқа видеороликларни яратиш ва кўриш хизмати Хитойнинг ByteDance компаниясига тегишли. 2018 йилда дастур бутун дунё фойдаланувчиларига тақдим этилган ва кенг оммалаша бошлаган. 2021 йилнинг сентябрь ойи охирида TikTok ойлик аудиторияси бир миллиард фойдаланувчидан ошганини эълон қилганди.

Эслатиб ўтамиз, июль ойида Ўзбекистонда TikTok ва Twitter’нинг очилиши секинлашди. 2 июль куни эса Ўзбекистонда айрим ижтимоий тармоқлар, хусусан, TikTok’дан фойдаланиш расман чекланди.

15 декабрь куни Миллий масс-медиани қўллаб-қувватлаш фонди раиси Комил Алламжонов TikTok ижтимоий тармоғи вице-президенти, доктор Тео Бертрам ва компаниянинг масъул ходимлари билан онлайн учрашув ўтказганини маълум қилди. Учрашувда ўзаро ҳамкорлик масалалари муҳокама қилинган. Алламжонов компания вакилларига тармоқнинг ички нормалари ва айрим тартиб-қоидаларини кўриб чиқиш, уни Ўзбекистон қадриятлари, урф-одат ва менталитетига мослаш бўйича таклифлар берган.