Транспорт вазирлиги «Тошкент шаҳар транспорти ва йўл-транспорт инфратузилмасини 2025 йилгача ривожлантириш концепциясини тасдиқлаш тўғрисида»ги Вазирлар Маҳкамаси қарори лойиҳасини муҳокамага қўйди.
Лойиҳада келтирилишича, Тошкент шаҳри ҳудуди кенгайиб бориши, янги ишлаб чиқариш объектлари пайдо бўлиши ҳамда аҳолига кўрсатиладиган транспорт хизматлари сифатини ошириш, йўловчи ташиш транспорти хизматларига бўлган эҳтиёж ва талабни тўлиқ қондириш мақсадида шаҳар йўловчилар транспорти йўналишлар тармоғини тубдан қайта кўриб чиқиш долзарблигини кўрсатмоқда.
Шу билан бирга, автотранспорт воситалари сонининг кўпайиб бориши, автобус йўналишлари самарасизлиги ва бир-бирини такрорлаши шаҳар йўловчилар транспортида юкламалар номутаносиблигини, аҳоли учун ноқулайликларни келтириб чиқармоқда.
Шу сабабли Тошкент шаҳар транспорти ва йўл-транспорт инфратузилмасини 2025 йилгача ривожлантириш концепцияси тасдиқланиши мумкин.
Унга кўра, Тошкент шаҳридаги тирбандликларни, марказий кўчаларда транспорт оқимини камайтириш, шахсий ва жамоат транспортининг ўртача ҳаракатланиш тезлигини ошириш, автомобилларнинг йўл бўйида бетартиб тўхташини тартибга солиш, транспорт воситаларидан атроф муҳитга чиқарилаётган заҳарли моддалар миқдорини камайтириш, аҳолининг жамоат транспортидан фойдаланишини рағбатлантириш мақсадида Тошкент шаҳрида ягона автомобиль йўл бўйи пуллик тўхташ жойлари тизимини ташкил этиш зарур.
Ушбу ягона тизимга шаҳар марказида, йирик бозорлар, савдо марказлари олдида ташкил этиладиган автомобилларнинг йўл бўйи пуллик тўхташ жойлари, йирик транспорт боғламалари, метронинг охирги ва йўловчи оқими юқори бўлган бекатлари ва шаҳарга асосий кириш жойлари ёнида ташкил этиладиган автотураргоҳлар, аҳоли яшаш жойларида ташкил этиладиган очиқ автомобиль сақлаш жойлари тармоқлари киритилиши керак.
Биринчи босқичда Тошкент шаҳрининг 10 та кўчасида, келгусида талабдан келиб чиқиб бошқа кўчаларда ҳам автомобилларнинг автоматлаштирилган йўл бўйи пуллик тўхташ жойлари тизими давлат-хусусий шериклик тамойиллари асосида ташкил этилади.
Аввалроқ Ўзбекистонда автомототранспорт воситаларини ижарага беришда нотариал тасдиқлаш тартиби бекор қилинаётгани, мамлакатда юридик шахслар ҳам автомобилларни қисқа муддатга ижарага олиши мумкин бўлгани тўғрисида хабар берилганди.
Изоҳ (0)