Бухоро вилоятининг Вобкент туманида эр-хотин ўз уйида вафот этди, деб хабар бермоқда «Дарё» мухбири. Туман суд тиббий экспертиза экспертининг маълум қилишича, улар ис газидан заҳарланган бўлиши мумкин.
Туманнинг «Чоргарон» маҳалласидаги Наймон қишлоғида яшовчи 47 ёшли Н.М. ҳамда 45 ёшли Д.Т.да биологик ўлим 20 декабрь куни тахминан соат 09:30 ларда қайд этилган.
«Биз етиб боргунга қадар уларнинг вафот этганига қарийб 6 соат бўлгани аниқланди. Уларнинг таналари қотиб қолган аҳволда эди. Биринчи ўрганув манбасига кўра, эр-хотин ис газидан заҳарланган. Бироқ бу ҳали якуний хулоса, дегани эмас. Айни пайтда экспертиза ҳаракатлари давом эттирилмоқда», — дейди Вобкент туман суд тиббий экспертиза эксперти.
Маҳалла фуқаролар йиғини раиси Раҳима Акрамованинг билдиришича, марҳум фуқароларнинг 3 нафар ўғли бўлиб, улар уйда ёш келини ҳамда кенжа ўғли билан қолган бўлган.
«Келинчак аввалига эрталабки нонуштадан кейин орадан 2-3 соат вақт ўтса-да, қайнона-қайнотасини дам оляпти, деб ўйлаган ва уларни безовта қилишга тортинган. Бироқ 4-5 соат ўтса-да, улар уйдан чиқмаган. Келинчак қайнонасининг қўл телефонига бир неча марта қўнғироқ қилган. Бироқ қўнғироқлар жавобсиз қолган. У қайнукасига ўзига ноқулай бўлаётгани, ота-онасидан бир хабар олишини сўраган. Минг афсуски, кенжа ўғил ота-онасининг аллақачон вафот этганига гувоҳ бўлган», — деди Раҳима Акрамова.
Айни пайтда туман прокуратураси томонидан терговга қадар текширув ишлари олиб борилмоқда.
Бундан аввал Самарқанд вилоятининг Иштихон туманидаги хонадонда номаълум моддадан заҳарланган фуқаро жасади топилганди. Дастлабки суриштирувда мазкур хонада кўмирнинг чала ёнишидан эҳтиётсизлик билан фойдаланилгани аниқланган.
Вилоятнинг Паст Дарғом туманидаги корхоналардан бирига ўрнатилган контейнер ичида икки ишчининг жасади номаълум моддадан заҳарланиш аломатлари билан топилганди. Кейинчалик улар ис газидан заҳарланиб, вафот этгани маълум бўлган.
Фарғонадаги боғчадан эса мавсумий ўт ёқувчи вазифасида ишловчи кишининг жасади топилганди. Суд тиббий экспертизанинг дастлабки хулосасига кўра, ис газидан заҳарланган деб бирламчи хулоса берилган.