Шавкат Мирзиёев 22 декабрь куни Тошкент вилояти Олмалиқ шаҳрига ташриф буюриб, Олмалиқ кон-металлургия комбинати (ОКМК)да «Ёшлик 1» конини ўзлаштириш инвестиция лойиҳаси бўйича олиб борилаётган ишлар билан танишди, деб хабар бермоқда «Дарё» мухбири.
Қайд этилишича, ушбу лойиҳа қиймати 5 миллиард 122 миллион доллар бўлиб, шундан 1 миллиард 633 миллион доллари ўз маблағлари ҳисобига, 1 миллиард 217,1 миллион доллари эса Тикланиш ва тараққиёт жамғармаси кредити ва устав фонди қўйилмаси ҳисобига амалга оширилади.
Ҳудуди 11 минг гектар бўлган кон йилига 65 миллион тонна маъдан қазиб олиш қувватига эга. Бу конда олтин, мис, кумуш, молибден, селен каби 13 турдаги қимматли ва нодир металлар бор. Уларни қайта ишлаш учун Олмалиқ кон-металлургия комбинатида 3-мис бойитиш фабрикаси қурилмоқда.
Президентга шу борадаги ишлар ҳақида ахборот берилди.
Бу ерда иш бошланган 2017 йилда йилига 3 миллион куб метр кон ишлари бажарилар эди. 415 миллион долларлик 570 дан зиёд замонавий техникалар олиб келингач, самарадорлик ўн карра ошди. Эндиликда иш ҳажми йилига 40 миллион куб метрни ташкил этмоқда.
«Бу кон — катализатор. Уни самарали ўзлаштириш билан бирга кичик конлар бўйича ҳам янги йўналиш қилиш керак. Бу ҳам қўшимча иш ўринлари, катта экспорт, дегани», — деди Шавкат Мирзиёев.
Лойиҳа доирасида, шунингдек, оҳак заводи, 650 мегаваттли электр тармоғи ва бошқа инфратузилма объектлари барпо этилади. Жами 6 минг киши иш билан таъминланади.
Давлат раҳбари ушбу комбинат, умуман, келгусида ҳар бир саноат корхонаси ўзини ўзи муқобил электр энергияси билан таъминлаши зарурлигини таъкидлади. Илмий тадқиқотларни ва мақсадли аспирантурани кенгайтириш, Тошкент давлат техника университетининг Олмалиқ филиали салоҳиятини ошириш бўйича топшириқлар берилди.
Эслатиб ўтамиз, Шавкат Мирзиёев 29 июль куни Олмалиқ шаҳрига ташриф буюриб, кон-металлургия комбинати конлари негизида рангли ва қимматбаҳо металлар ишлаб чиқаришни кенгайтириш борасидаги ишлар билан танишганди. Ўша куни давлат раҳбати Олмалиқ кон-металлургия комбинатининг 3-мис бойитиш фабрикаси қурилишига тамал тошини қўйганди.
Изоҳ (0)