Ижтимоий тармоқ, хусусан Facebook фойдаланувчиси Жавлон Жовлиев 2021 йилнинг 20 декабрь куни жамоатчиликка видео улашиб, Қамаши туманидаги Сартўлди қишлоғида жойлашган мактаб филиали аҳволини кўрсатди. Видеога изоҳ берган муаллиф «мактабларнинг бундай аҳволдалиги миллат фожиасидир», дея изоҳ қолдирди. Қамаши тумани ҳокими 21 декабрь куни ушбу мактаб филиалига борди.

«21 декабрь Қамаши тумани ҳокими Сартўлди қишлоғидаги ушбу мактаб филиалига борди. Қишлоқ аҳолиси билан суҳбатлашди. Аҳолининг муаммоларига қулоқ тутди. Маълум бўлишича, ушбу қишлоқда 37 та хонадон мавжуд. Қишлоқда 41 нафар бола мактаб ёшида. Уларнинг аксарияти 15-мактабнинг асосий биносида таҳсил олади. Фақатгина тўрт нафар бола мактаб филиалида таълим олиб келмоқда. Тарқалган видеода эса болалар сони 11 нафарни ташкил қилган», — дейилади туман ҳокимининг филиалга боргани ҳақида хабар берган Қамаши тумани ҳокимлиги ахборот хизмати муносабатида.

Бу ҳақда «Дарё» мухбири билан суҳбатлашган туман ҳокимлиги ахборот хизмати раҳбари Нурбек Расулов вазият бўрттириб кўрсатилганини айтмоқда.

«Аслида, тўрт нафар ўқувчиси бўлган филиалга 11 нафар ўқувчини киритиб, якшанба куни ‘съёмка’ қилишган. Тўғри, муаммо бор, аммо уни бундайин бўрттириб кўрсатиб, жамоатчиликни чалғитиш яхшимас», — деди Нурбек Расулов.

Қайд этилишича, ҳолат юзасидан вилоят халқ таълими бошқармаси, Қамаши туман ҳокимлиги, туман халқ таълими бўлими масъуллари иштирокида ўрганиш олиб борилган.

«Масъуллар ахборотига кўра, филиал мактабда жами тўрт нафар (2-синфда 1 нафар, 3-синфда 1 нафар, 4-синфда 2 нафар) ўқувчи таълим-тарбия олади. Филиал мактаб комплект-синф кўринишида шакллантирилган. ‘Рабод’ МФЙ Сартўлди қишлоғида жойлашган 15-сонли филиал мактабнинг асосий биносидан 12 километр узоқликда жойлашган», — дейди масъул.

Қўшимча қилинишича, филиал сифатида фойдаланиб келинган бино яроқсиз деб топилиб, ёпилган.

«Ушбу ҳолат ўрганилди ва мактаб филиали биноси фойдаланишга яроқсиз деб топилиб, бугундан ёпилди. Тўрт нафар боланинг асосий мактабда ўқиши учун туман ҳокимлиги ҳисобидан автомобиль қатнови йўлга қўйилиши белгиланди. Шунингдек, аҳолининг демографик ўсишини ҳисобга олиб, 2023 йилда ушбу ҳудудда 60 ўринли мактаб қурилиши учун инвестиция дастурига таклиф киритилиши маълум қилинди», — деди Нурбек Расулов.