21 декабрь куни президент Гурбангули Бердимуҳамедов Туркманистон Хавфсизлик кенгашининг айрим аъзолари билан йиғилиш ўтказиб, мамлакатга коронавируснинг «омикрон» штамми кириб келишига йўл қўймаслик масаласини муҳокама қилди. Бу ҳақда «Хроники Туркменистана» нашри хабар берди.
Муҳокама аввалида мамлакат раҳбари Туркманистонда коронавирусга чалиниш ҳолатлари аниқланмаганини таъкидлаган, бироқ унинг янги вариантлари, хусусан, «омикрон» штамми пайдо бўлгани сабаб эътиборсиз бўлмасликка чақирган.
«Туркменистан сегодня» давлат ахборот агентлигининг ёзишича, Бердимуҳамедов янги штамм мамлакат бўйлаб «чегаралар орқали одамлар ва товарларнинг ўтиши» сабаб тарқалаётганини маълум қилган ва Миграция хизмати раиси Назар Атагараев, Божхона хизмати бошлиғи Максат Худайқулиев ва Хавфсизлик кенгаши котиби Чори Амановга ўтказилаётган профилактика чоралари бўйича маълумот беришни буюрган. Агентлик уларнинг ҳисоботини келтирмаган.
Йиғилиш якунларига бўйича президент Амановга бозорлар маҳсулотлар билан таъминланишини қаттиқ назоратга олишни ва мамлакатда озиқ-овқат захираларини мунтазам таҳлил қилиб боришни топширган.
Божхона хизмати бошлиғи Худайқулиев хориждан олиб келинаётган озиқ-овқат маҳсулотларининг санитария жиҳатдан қайта ишланишини қатъий назорат қилиб, мамлакат бозорларига тез етказиб берилишини таъминлаши лозим.
Миграция хизмати бошлиғига «вилоятлараро автомагистраллар бўйлаб фаолият юритувчи назорат-ўтказиш пунктлари орқали Ашхобод шаҳрига озиқ-овқат юкланган юк машиналарининг тўсиқсиз ҳаракатланишини таъминлаш» топширилган. Мамлакатнинг бошқа шаҳарлари ва аҳоли пунктлари ҳақида сўз бормаган. Шунингдек, чегаралар юкларнинг ҳаракатланиши учун қисман ёки тўлиқ ёпилишига ҳам аниқлик киритилмаган.
Эслатиб ўтамиз, ЖССТ Туркманистоннинг мамлакатда коронавирусга чалиниш ҳолатлари йўқлиги ҳақидаги даъвосини шубҳа остига қўйган. «Вирус пандемия сифатида қарийб икки йилдан бери бутун дунё бўйлаб тарқалмоқда. Илмий жиҳатдан у Туркманистонда тарқалмагани даргумон», — деган ЖССТнинг фавқулодда вазиятлар бўйича катта ходими Кетрин Смоллвуд.
Доктор Смоллвуднинг муносабати ЖССТнинг Туркманистон баёнотига биринчи оммавий эътирозидир, чунки мамлакатда норасмий манбалар COVID-19 ҳолатлари сони ортиб бораётгани ҳақида хабар бермоқда. Сентябрь охирида Туркманистон фуқаролари ЖССТга мурожаат қилиб, ундан Туркманистон ҳукуматини COVID-19 ни тан олишга мажбур қилишни сўраган эди.
Изоҳ (0)