21-dekabr kuni prezident Gurbanguli Berdimuhamedov Turkmaniston Xavfsizlik kengashining ayrim a’zolari bilan yig‘ilish o‘tkazib, mamlakatga koronavirusning “omikron” shtammi kirib kelishiga yo‘l qo‘ymaslik masalasini muhokama qildi. Bu haqda “Xroniki Turkmenistana” nashri xabar berdi.
Muhokama avvalida mamlakat rahbari Turkmanistonda koronavirusga chalinish holatlari aniqlanmaganini ta’kidlagan, biroq uning yangi variantlari, xususan, “omikron” shtammi paydo bo‘lgani sabab e’tiborsiz bo‘lmaslikka chaqirgan.
“Turkmenistan segodnya” davlat axborot agentligining yozishicha, Berdimuhamedov yangi shtamm mamlakat bo‘ylab “chegaralar orqali odamlar va tovarlarning o‘tishi” sabab tarqalayotganini ma’lum qilgan va Migratsiya xizmati raisi Nazar Atagarayev, Bojxona xizmati boshlig‘i Maksat Xudayquliyev va Xavfsizlik kengashi kotibi Chori Amanovga o‘tkazilayotgan profilaktika choralari bo‘yicha ma’lumot berishni buyurgan. Agentlik ularning hisobotini keltirmagan.
Yig‘ilish yakunlariga bo‘yicha prezident Amanovga bozorlar mahsulotlar bilan ta’minlanishini qattiq nazoratga olishni va mamlakatda oziq-ovqat zaxiralarini muntazam tahlil qilib borishni topshirgan.
Bojxona xizmati boshlig‘i Xudayquliyev xorijdan olib kelinayotgan oziq-ovqat mahsulotlarining sanitariya jihatdan qayta ishlanishini qat’iy nazorat qilib, mamlakat bozorlariga tez yetkazib berilishini ta’minlashi lozim.
Migratsiya xizmati boshlig‘iga “viloyatlararo avtomagistrallar bo‘ylab faoliyat yurituvchi nazorat-o‘tkazish punktlari orqali Ashxobod shahriga oziq-ovqat yuklangan yuk mashinalarining to‘siqsiz harakatlanishini ta’minlash” topshirilgan. Mamlakatning boshqa shaharlari va aholi punktlari haqida so‘z bormagan. Shuningdek, chegaralar yuklarning harakatlanishi uchun qisman yoki to‘liq yopilishiga ham aniqlik kiritilmagan.
Eslatib o‘tamiz, JSST Turkmanistonning mamlakatda koronavirusga chalinish holatlari yo‘qligi haqidagi da’vosini shubha ostiga qo‘ygan. “Virus pandemiya sifatida qariyb ikki yildan beri butun dunyo bo‘ylab tarqalmoqda. Ilmiy jihatdan u Turkmanistonda tarqalmagani dargumon”, — degan JSSTning favqulodda vaziyatlar bo‘yicha katta xodimi Ketrin Smollvud.
Doktor Smollvudning munosabati JSSTning Turkmaniston bayonotiga birinchi ommaviy e’tirozidir, chunki mamlakatda norasmiy manbalar COVID-19 holatlari soni ortib borayotgani haqida xabar bermoqda. Sentabr oxirida Turkmaniston fuqarolari JSSTga murojaat qilib, undan Turkmaniston hukumatini COVID-19 ni tan olishga majbur qilishni so‘ragan edi.
Izoh (0)