«Ўзгидромет» 21 декабрь куни шамол тезлиги баъзи жойларда 25-28 метр/сониягача кучайиб, Қорақалпоғистон, Хоразм, Бухоро, Навоий вилоятларида ва республиканинг чўл ҳудудларида чанг бўрони ва ғуборлар кўтарилиши мумкинлиги тўғрисида хабар берганди. Айни пайтда Қашқадарё вилоятида ушбу табиат ҳодисаси кузатилмоқда. Соғлиқни сақлаш вазирлигининг маълум қилишича, чанг бўрони муносабати билан аҳолига тиббий ёрдам кўрсатиш учун барча зарур чоралар кўрилган.
Маълум қилинишича, Республика шошилинч тиббий ёрдам илмий маркази ва унинг ҳудудлардаги 13 та филиали ҳамда 179 та аҳоли пунктида жойлашган субфилиаллари доимий шай ҳолатда.
Бундан ташқари, мамлакат бўйлаб 2861 та тез тиббий ёрдам бригадаси зарур дори-дармонлар билан етарли миқдорда тўлиқ таъминланган. Шошилинч ва тез тиббий ёрдам тизимида фаолият кўрсатаётган қарийб 17 минг нафарга яқин шифокор ва 52 минг нафардан зиёд ҳамшираларга зарур кўрсатмалар берилган.
«Қолаверса, аҳоли Соғлиқни сақлаш вазирлигининг 1003 қисқа рақамли Call-марказининг малакали мутахассисларидан чангли ҳаводан қандай ҳимояланиш бўйича тун-у кун керакли маслаҳат ва тавсиялар олишлари мумкин», — дейилади хабарда.
Таъкидланишича, хона ёки иншоотларни нам латта билан тозалаб туриш, уй ёки бино ичига, атрофига сув солинган идишлар қўйиш чанг даражасини пасайтиришга хизмат қилади. Қолаверса, бундай вазиятда нам сочиқларни осиб қўйиш, кондиционер ва ҳавони тозалаш тизимлари ҳам асқатади.
Деразаларни ёпиқ ҳолда сақлаш, кўпроқ сув ичиш, тез-тез душ қабул қилиш нафас олишни енгиллаштиради. Оғиз ва бурун бўшлиғини тузли эритма билан ювиб туриш ҳам катта самара беради.
Очиқ ҳавода юрганда, албатта, тиббий ниқоб тақиб юриш ва уларни ҳар икки соатда алмаштириш шарт. Ёш болалар, ҳомиладор аёллар ва ёши катта инсонлар ҳам бундай вазиятда эҳтиёткор бўлишлари тавсия этилади.
Агар фуқароларда ташқи муҳитдаги чанглар туфайли нафас қисиши, бурун битиши, аксириш, бурун оқиши, кўзларда қичишиш ва қизариш, томоқда кучли қичишиш, қичишиш билан кузатиладиган йўтал белгилари юзага келса, тезда оилавий шифокор пункти, оилавий поликлиникаларга мурожаат қилишлари лозимлиги қайд этилган.
Эслатиб ўтамиз, Ўзбекистонга 4 ноябрь куни Урал томондан совуқ ҳаво оқими, у билан бирга кучли шамол кириб келиши оқибатида (шамол тезлиги Тошкентда сониясига 15 метргача, Бухоро, Навоий, Жиззах вилоятларида эса 25 метргача кучайган) мамлакатнинг бир қатор ҳудудларида, хусусан, Тошкент шаҳрида чанг-қум бўронлари кузатилганди. «Ўзгидромет» маълумотларига кўра, шу куни соат 21:00-23:00 оралиғида Тошкент ҳавосидаги чанг рухсат этилган миқдордан 30 баробаргача ошиб кетди ва ҳавосининг ифлосланиши даражаси бўйича Ўзбекистон пойтахти дунёда биринчи ўринга чиқди. Чанг 8 ноябрга келибгина чекинди, унгача пойтахт аҳолиси салкам тўрт кутилмаган ноқулайлик гирдобида қолди (масалан, Соғлиқни сақлаш вазирлиги маълумотларига кўра, 5 ноябрдан 6 ноябрь соат 6:00 га қадар тез ёрдамга бўлган 4110 та чақириқдан 709 тасида фуқаролар нафас олиш билан боғлиқ муаммолардан шикоят қилган).
Шунингдек, 19 декабрь куни Самарқанд ва Қашқадарё вилоятларининг айрим ҳудудларида кучли шамол ва чангли бўрон кузатилган эди. Ўша куни соат 13 дан 15 гача Тошкент, Жиззах, Сирдарё вилоятларида ёмғир ёғишидан олдин шамол кучайиши, баъзи жойларда қисқа муддатга чангли бўронлар кўтарилиши мумкинлиги маълум қилинганди.
Изоҳ (0)