«Оилавий тадбиркорликни ривожлантириш ва аҳолининг даромад манбаини кенгайтиришга доир қўшимча чора-тадбирлар тўғрисида»ги президент қарори қабул қилинди. Бу ҳақда Telegram’даги «Ҳуқуқий ахборот» канали хабар берди.
Қарорга мувофиқ, 2022 йилда оилавий тадбиркорликни ривожлантириш дастурлари доирасида мақсадли жамғармалар ҳамда Тикланиш ва тараққиёт жамғармасининг ресурслари банкларга йиллик 10 фоизда жойлаштирилади, имтиёзли кредитлар йиллик 14 фоиз ставкада:
- аҳоли ҳамда тадбиркорларга — 3 ойдан 6 ойгача, имтиёзли давр билан 3 йилгача;
- чорвачилик, балиқчилик ва паррандачилик учун — 1 йилгача, имтиёзли давр билан 3 йилгача;
- боғдорчилик, узумчилик ва лимончилик, иссиқхона, қишлоқ хўжалиги техникаси ва асбоб-ускуналарни харид қилиш учун — 3 йилгача, имтиёзли давр билан 7 йилгача;
- «Ҳунарманд» уюшмаси аъзоларига — 3 йилгача ҳамда айланма маблағларни тўлдириш учун 18 ойгача ажратилади.
Шунингдек, «етакчи» тадбиркорларга деҳқон хўжаликлари ер майдонлари ва аҳоли томорқаларида қишлоқ хўжалиги маҳсулотларини кооперация асосида етиштириш ва етиштирилган маҳсулотларни харид қилиш учун айланма маблағларни тўлдиришга кредитлар ажратилади.
2022 йил 1 мартдан кредитлар тўлиқ рақамлашган ҳолда Оилавий тадбиркорликни ривожлантириш дастурларининг ягона электрон платформаси орқали ажратилади.
Аввалроқ Ўзбекистонда балиқ етиштирувчи хонадон эгалари учун ер-мулк солиғи 50 фоизга камайтирилиб, улар ўзини ўзи банд қилган аҳоли тоифасига ўтказилиши, 2022 йилда 500 минг гектардан зиёд томорқадан самарали фойдаланиш учун 100 миллион доллар ажратилиши тўғрисида хабар берилганди.
Изоҳ (0)