Трендлар қисқа ва вақтинчалик бўлади. Унга биноан харид қилинган кийим ўша вақтнинг ўзида долзарб бўлиши вақт ўтиб, мода ўзгарганидан кейин эса бачкана кўриниши, кийилмасдан гардеробда ортиқча жой эгаллаб ётиши мумкин. Marie Claire қишки гардеробни ҳадеб янгилайвермаслик учун қандай пальто моделларига эътибор қаратиш кераклиги ҳақида маълумот бериб ўтади.
Қаймоқ ранг пальто
Ҳар кимнинг диди ва кийиниш борасидаги танлови турли бўлади. Аммо шунга қарамай гардеробда ҳамма кийим билан мос тушадиган универсал устки кийим бўлиши муҳимдир. У билан нафақат классик усулда кийиниш, балки кундалик ва оқшом образлари билан ҳам мослаш мумкин.
Калта пальто моделлари
Яна бир универсал ҳисобланган калта пальто моделлари билан исталган услубда кийинса бўлади. Уни нафақат калта юбка ва кўйлак, балки миди узунлигидаги либослар билан ҳам мосласангиз бўлади. Боғичли ботинка ва ўзига хос сумка эса образни янада қизиқарли кўринишига сабаб бўлади.
Катак принтли пальто
Тасвир ва суратлар бор кийимлар тез урфдан қолгани сабаб ҳам стилистлар оддийроқ устки кийимларга эътибор қаратишни тавсия қилади. Исталган ранг ва услуб билан мослаш мумкин бўлган клеткали вариантлар эса бу борада айни муддао ҳисобланади.
Тренч
Тренч фақат баҳор ва кузги илиқроқ ҳавода кийиш учун мўлжалланган деб ўйлаганлар янглишади. Ҳар томонлама қулай ва қоматни чиройли кўрсатгани сабаб ҳам дизайнерлар тренчларнинг қалин ва иссиқ тутадиган моделларини ишлаб чиқаришни аллақачон бошлаб юборган. Танлов борасида белбоғи бор, oversize моделларга эътибор қаратиш тавсия қилинади. Хоҳишга қараб белбоғни камар ёки рўмолга алмаштиришингиз ва ўзига хос образ яратишингиз мумкин бўлади.
Изоҳ (0)