Қишда об-ҳаво доим ҳам фаслга мос тарзда ўтавермайди. Шунингдек, қор ёғиши ёки қаттиқ совуқ ҳар қандай кийиниш услубига ўз таъсирини ўтказади. Устки кийим, пойабзал ва аксессуарлар танлашда эркинлик мавжуд. Аммо шунда ҳам аксарият аёллар қишки услубни яратишда бир қанча хатоликларга йўл қўяди.
Аёлларнинг қишки гардеробидан одатда қора, кўк ёки кул ранг кийимлар жой олади. Албатта, ушбу ранглар кўзга ташланмаслиги билан афзал. Аммо уларнинг инсон кайфиятига ҳам таъсири мавжуд. Шунинг учун қишки образ яратишда бироз ёрқинроқ рангларга ҳам эътибор қаратиш лозим. Улар тасвирга бироз енгиллик беради.
Бош кийим нафақат ташқи кўриниш, балки соғлиғи ҳақида ҳам қайғурадиган ҳар қандай аёл учун қишки гардеробнинг энг муҳим элементларидан биридир. Бироқ нотўғри танланган бош кийим ҳатто энг идеал қишки кўринишга ҳам путур етказади. Мўйнали бош кийимлар урфдан қолган. Дизайнерлар ҳозирча бу каби бош кийимдан воз кечишни тавсия этмоқда.
Қишда иссиқ устки кийим билан унга мос равишда колготка танлаш лозим. Оч рангли колготкалар образни мукаммал қилмайди, аксинча унга путур етказади. Шу туфайли ҳар қандай рангдаги устки кийим билан айнан қиш фаслида қора ёки бошқа тўқ рангли колготка кийиш тавсия этилади.
Кардиган кўп вақт давомида мода ихлосмандларининг гардеробидан жой олди. Унинг турли бичимдагилари ҳар қандай образ учун мос келади. Аммо дизайнерлар иложи борича тугмасиз кардиган танлашни тавсия этади.
Совуқ мавсум учун мўлжалланган асосий кийим курткадир. Уларни калта, узун ва рангларини ҳар ким дидига кўра танлайди. Аммо қалин курткаларнинг тор бичимдагиси қоматнинг камчиликларини яққол намоён этади ва ҳаракатланишда ноқулайлик туғдиради. Дизайнерларнинг сўзларига кўра, бу каби иссиқ кийимлар бироз кенгроқ ва тўғри бичимда бўлгани маъқул.
Қишки образни бойитадиган энг асосий аксессуардан бири шарфдир. Ҳозирда узун ёрқин рангли шарфлар урфда. Аввалгидек кичик ўрама шарфлар энди ўзини оқламайди, замонавий кийимлар билан комбинация ҳосил қила олмайди.
Изоҳ (0)