Гепатит билан касалланганлар, дори воситаларини қабул қиладиганлар ва ҳатто шунчаки турмуш тарзининг соғлом эмаслиги ҳам жигар билан боғлиқ жиддий муаммога олиб келиши мумкин. «Домашний очаг» нашри жигар циррози ҳақида барча билиши керак бўлган маълумотларни эътиборингизга ҳавола қилади.
Биринчи факт: Цирроз чиндан ҳам кўп тарқалган касаллик
Аксарият ҳолларда жигар циррозини сурункали спиртли ичимлик интоксикацияси келтириб чиқаради. Спиртли ичимликларга муккасидан кетган ҳар учинчи одамда одатда 10-15 йилдан кейин ушбу касаллик кузатилади. Унда гепатоцитлар некрози ва фибрози туфайли жигар ҳужайралари шикастланади. Оқибатда жигар қонни аввалгидек тозала олмайди, шунчаки бириктирувчи тўқималарнинг йиғиндиси бўлиб қолади.
Иккинчи факт: Исталган спиртли ичимлик, ҳатто энг сифатлиси ҳам хавфли ҳисобланади
Этанолнинг ҳатто кам миқдордагиси ҳам жигарга салбий таъсир қилади. Этанол жигар тўқималарида фиброгенезни фаоллаштирадиган ёқимсиз хусусиятга эга ҳисобланади. Бошқача тушунтирганда, айнан унинг таъсирида ҳужайралар коллаген ишлаб чиқара бошлайди. Оқибатда ишга лаёқатли ҳужайралар ўрнини фойдасиз бириктирувчи тўқималар эгаллайди. Кунига 40-80 грамм этанол (200-400 грамм ароқ) хавфли доза ҳисобланади.
Учинчи факт: Цирроз билан спиртли ичимлик истеъмол қилмайдиганлар ҳам касалланиши мумкин
Вирусли гепатит, ўт пуфак касалликлари, токсинлар таъсири, дори воситаларини ҳаддан ортиқ истеъмол қилиш ҳамда баъзи инфексион касалликлар ҳам циррозга олиб келиши мумкин.
Тўртинчи факт: Ўз вақтида даволаш бошланса, касалликни секинлаштириш ва ҳатто тузалиб кетиш мумкин
Қанча аввал ташхис қўйилса, шунча яхши. Спиртли ичимликлар келтириб чиқарган циррознинг эрта даврида алкоголдан тийилиш ва замонавий даволаниш яхши самара берса, вируслисида касалланишнинг ривожланишини тўхтатади. Жигар шишиши, тери сарғайиши ва бурундан қон кетиши сингари клиник симптомлар касалланишнинг кейинги босқичларида кузатилгани сабаб ҳам улар пайдо бўлгунида қўл қовуштириб ўтириш ярамайди. Яхшиси, шифокорга бориб, керакли таҳлилларни топшириш керак.
Бешинчи факт: Цирроз — сурункали касаллик
Цирроз яхшиланиши, стационар аҳволда кечиши, ёмонлашиши ва ҳатто ўлимга олиб келиши мумкин. Бутунлай тузалиб кетиш эса ушбу рўйхатда йўқ. Аммо шу билан бирга: алкоголь сабаб келиб чиққан циррозда ўз вақтида чора кўрилса, жигар ҳужайраларининг тикланишига эришиш мумкинлигини унутмаслик керак.
Олтинчи факт: Гепатит ҳар доим ҳам циррозга сабаб бўлавермайди
Замонавий даволаш чоралари туфайли ўткир вирусли гепатит, сурункалига ўтиб кетишининг олдини олса бўлади. Сурункалига ўтган тақдирда ҳам, камдан кам ҳолларда цирроз билан якун топади. Статистика маълумотларига кўра, цирроз гепатитнинг B ёки C тури симптомли ё бўлмаса, аломатсиз кечаётган тахминан 1 фоиз беморларда ўртача 5 йил ичида ривожланади. Гепатит D ва G эса хавфлироқ ҳисобланади ва циррознинг ривожланиш хавфини сезиларли даражада оширади.
Изоҳ (0)