Сиз оддий ва одатий деб ўйлаган аломатлар шунчаки кузатилмаслиги, уларга эътибор берилмаса, оқибати салбий якун топиши мумкин. Marie Claire қандай симптомлар юрак билан боғлиқ касалликлар хавфидан огоҳлантириши ҳақида маълумот бериб ўтади.
Кўкрак қафасидаги оғриқ
Юракнинг кўкрак қафасига оғриқ бериши аксарият ҳолларда жисмоний ёки эмоционал зўриқишлардан кейин кузатилади. Бунда чап қўл, елка ва чакка соҳасида дискомфорт сезилади. Машғулотлар ёки жисмоний фаолликдан кейин ушбу аломатларнинг тезда ўтиб кетиши бефарқ бўлишингизга сабаб бўлмаслиги керак. Аслида, юрак соҳасидаги исталган оғриқ ҳиссининг пайдо бўлиши мутахассисга мурожаат қилиш учун сабаб бўла олади.
Нафаснинг қисиши ва нафас билан боғлиқ муаммолар
Бу нафақат коронавирус, балки юрак саломатлиги билан боғлиқ жиддий муаммо борлигидан дарак берувчи симптом ҳисобланади. Нафас қисиши ва ҳаво етишмаслиги нафақат спорт машқларидан кейин, балки уйқунинг ўртасида ҳам кузатилишига бир қанча касалликлар сабаб бўлади. Шундай экан эътиборсиз бўлмасдан, дарҳол шифокорга мурожаат қилинг.
Қон босимининг ўзгариши
Қон босимининг 140 га 90 бўлиши гипертония, аммо ҳатто 130 га 80 қон босими билан юрадиганлар ҳам хавф гуруҳига киради. Айнан шу сабаб ҳам улар кардиологга мурожаат қилиб, гипертоник касалликлар ривожланишига сабаб бўладиган қўшимча омиллар бор ёки йўқлиги ҳақида маълумотга эга бўлиши керак.
Бош оғриши, бош айланиши ва ҳушдан кетиш
Бундай симптомлар кузатилганда одамлар аксарият ҳолларда неврологга мурожаат қилади. Аниқ сабаби топилмаса, демак, ўзгариш юрак-қон томир тизими билан боғлиқ бўлади.
Юрак фаолияти билан боғлиқ муаммолар, пулснинг бузилиши
Юрак урушининг тезлашиши ёки аксинча ҳолат кузатилганда кардиологга мурожаат қилишни кечиктирмаслик керак. Бунга бошқа касаллик сабаб бўлса ҳам, кардиолог комплекс даво учун кўрсатма бериши, зарурияти бўлганда керакли мутахассисга йўналтириши мумкин.
Холестерин миқдорининг юқорилиги
«Ёмон» холестерин миқдорининг юқори экани юрак-қон томир касалликлари билан боғлиқ муаммолар пайдо бўлишига олиб келиши мумкин. Шу сабаб ҳам кардиологга учраш, ташхис қўйиш янада аниқ бўлиши учун холестерин миқдори билан боғлиқ таҳлиллар топшириш керак.
ЭКГда ўзгариш
Сиз ўзингизни яхши ҳис қилган тақдирда ҳам, ЭКГда ўзгариш чиқиши юрак билан боғлиқ муаммодан дарак бериши мумкин. Бундай ҳолат кузатилганда кардиологга мурожаат қилиб, даво чораларини кўришни бошланг. Қанча олдин ҳаракат қилсангиз, шунча эрта олдини олишга эришасиз.
Чарчоқ, жисмоний фаол бўла олмаслик
Ҳатто оддий уй юмушларини бажаришга ҳам ҳолингиз бўлмаса, бироз тоза ҳавода сайр қилган тақдирда ҳам, чарчаб қолсангиз, зудлик билан шифокорга бориш тавсия қилинади. Гап шундаки, айрим ҳолларда юрак билан боғлиқ касалликлар яққол кўзга ташланадиган симптомлар — нафас қисиши ва оғриқдан ташқари, чарчоқ ва лоҳаслик билан ҳам бошланиши мумкин.
Ирсият
Қариндошларингиз орасида юрак билан боғлиқ жиддий касалликлардан азият чеккан ва шу сабаб эрта ҳаётдан кўз юмган кишилар бўлса, кардиолог тавсиясига биноан профилактик чораларга амал қилиб юринг. Ёғли овқатланманг, зарарли одатлардан воз кечинг, асабийлашишни бас қилиб, тоза ҳавода вақти-вақти билан сайр қилиб туринг.
Изоҳ (0)