Қашқадарёда эркак иккинчи хотинининг 15 ёшли ўғли томонидан пичоқлаб ўлдирилди

Қашқадарё вилоятининг Деҳқонобод туманида яшовчи 51 ёшли эркак никоҳсиз иккинчи хотинининг 15 ёшли ўғли томонидан пичоқлаб ўлдирилди. Бу ҳақда вилоят ИИБ бошлиғи Шуҳрат Сотволдиев раҳбарлигида Деҳқонобод туманида бўлиб ўтган жиноят муҳокамасига бағишланган йиғилишда маълум қилинди, дея хабар берди «Дарё» мухбири.

Маълум қилинишича, воқеа 2021 йилнинг 10 декабрь куни соат 23:55 да содир бўлган. Туманнинг Деҳқонобод шаҳарчасида яшовчи фуқаро Т.Б. (1970 йилда туғилган) 10 декабрь куни иккинчи хотини Н.Х. билан кафеда ўтириб, спиртли ичимлик ичган. Соат 22:00 дан ўтганидан сўнг эр-хотин кафедан чиқиб, пиво сотувчи барга кирган. Пиво ичиш давомида эр-хотин ўртасида тортишув юзага келган.

Жанжал Н.Х.нинг «Завқий» маҳалласидаги уйида ҳам давом этган. Хонадон ошхонасидан пичоқ олиб чиққан маст эркак аёлига пичоқ ўқталиб, уни ўлдирмоқчилигини айтган. Аёлнинг воқеани кузатиб турган 15 ёшли ўғли, 9-синф ўқувчиси Ш.Ж. онасига ёрдам бериш мақсадида маст эркак қўлидаги пичоқни олиб қўймоқчи бўлган. Шунда маст эркак ва бола ўртасида жанжал келиб чиққан.

Қайд этилишича, онаси ва ўзини ҳимоя қилишга уринган бола Т.Б.ни пичоқ билан яралаб, унинг ўлимига сабаб бўлган.

Мазкур ҳолат юзасидан Деҳқонобод туман прокуратураси томонидан 15 ёшли болага нисбатан Жиноят кодексининг 100-моддаси (зарурий мудофаа чегарасидан четга чиқиб, қасддан одам ўлдириш) билан жиноят иши қўзғатилиб, Жиноят процсессуал кодексининг 221-моддаси тартибида ушланган.

Аввалроқ Тошкентда 17 ёшли мактаб ўқувчиси ўз отасини пичоқлаб ўлдиргани, Тошкентда 14 ёшли бола у билан саломлашмаган 22 ёшли йигитни пичоқлагани, Қорақалпоғистонда маст ҳолдаги 57 ёшли эркак хотини ва 18 ёшли қизини ўлдириб қўйгани хабар қилинган.