Бухоро вилояти Когон шаҳрида 16 ноябрь куни тупроқ ўпирилиши оқибатида 2 киши ҳалок бўлгани тўғрисида хабар берилганди. Бандлик ва меҳнат муносабатлари вазирлиги матбуот хизмати ушбу бахтсиз ҳодисанинг содир бўлишига олиб келган асосий сабабларни маълум қилди.
Унда келтирилишча, «61-автокорхона» МЧЖ иш берувчиси Когон шаҳар «Дўстлик» МФЙ Дўстлик кўчасида жойлашган диаметри 1000 миллиметрли пластмасса канализация қувурларини реконструкция қилишга ишларни хавфсиз олиб бориш юзасидан меҳнатни муҳофаза қилиш бўйича белгиланган тартибда йўл-йўриқлар олмаган ишчиларни жалб этган.
Канализация қувурларини реконструкция қилиш ишларини амалга ошириш учун қазилган ўра (бўйи 5,0-5,5 метр, эни 5-6 метр атрофида) девори қулаб тушмаслиги учун келтириб қўйилган катталиги 2,6 х 4,6 ҳажмдаги 2 та темир панжара ўрнатилмаган.
Вазият сабабларини бартараф этиш чора-тадбирлари белгиланиб, мазкур бахтсиз ҳодиса меҳнат фаолияти билан боғлиқ деб топилган.
Ҳолат юзасидан Жиноят кодексининг 257-модда (меҳнатни муҳофаза қилиш қоидаларини бузиш), 2-қисми бўйича жиноий иш қўзғатилган. Ушбу қисмга кўра, айбланувчи муайян ҳуқуқдан маҳрум қилиниб, икки йилдан беш йилгача озодликни чеклаш ёхуд беш йилгача озодликдан маҳрум қилиш билан жазоланади.
Аввалроқ Қорақалпоғистонда тупроқ босиб қолиши оқибатида сув қувури қазиётган 3 киши вафот этгани, Самарқандда қувурни таъмирлаётган икки ишчи тупроқ босиб қолиши оқибатида ҳалок бўлгани ҳақида хабар берилганди.
Изоҳ (0)