«Афғонистонлик қочқинлар юртига мажбуран қайтарилмайди» — Исматулла Иргашев Ўзбекистонда яшаб келаётган афғонлар ҳақида

АОКАда Ўзбекистон президентининг Афғонистон бўйича махсус вакили Исматулла Иргашев мамлакатда бўлиб турган афғон фуқаролари ҳақида маълумот берди.

«Авваламбор, Ўзбекистон ҳудудида яшаб келаётган афғон фуқароларини мажбурий равишда Афғонистонга қайтариш режаларимиз йўқ.

Термизда жуда кўплаб афғон қочқинлари бор, деган маълумот нотўғри. Бундай қочқинлар Термизда оммавий тарзда яшаб келаётгани йўқ. Фожиали 14–15 август кунларида Амударёдан қочиб ўтган, тахминан, 150 нафар афғон қочқинлари Термизда бор эди. Бир қанча афғонлар Европа мамлакатларига қочоқ мақомини олган ҳолда жўнаб кетди.

Мен улар билан гаплашганимда айтишдики ‘Исматулла ака агар ‘Толибон’ ҳукумати бизни ўлдирмайдиган бўлса, бизни қамамайдиган бўлса, бизнинг қолишга моддий имкониятимиз йўқ, биз мамлакатимизга қайтиб кетамиз’, дейишди. Мен ўзим ‘Толибон’ ҳукумати раҳбарлари билан гаплашдим, улар ‘Биз уларга тегмаймиз, агар улар халқи учун, ватани учун хизмат қилишга тайёр бўлса, биз уларни афв этамиз, дейишди. Улар орасида ҳарбийлар ҳам бор эди. Мен ўзим буни шахсан назоратимга олдим: улардан бирортаси ўлдирилмади, қамалмади.

Ўзбекистон ҳудудидаги турли шаҳарларда яшаб келаётган афғон фуқаролар ҳақида айтадиган бўлсак, уларнинг бир қисмига учинчи давлатларга қочоқ мақомида кўчиб ўтиши учун халқаро институтлар ёрдам беради, бу ерда қолиб ишлаш ва яшаш имкониятига эга бўлганлар визаси узайтирилишига ёрдам берилади. Шу билан бирга, визаси узайтирилмаганлар мажбурий равишда мамлакатдан чиқариб юборилмайди», — деди Исматулла Иргашев.