Toshkentda 14 yoshli bola u bilan salomlashmagan 22 yoshli yigitni pichoqladi

Toshkentda voyaga yetmagan shaxs 22 yoshli yigitni pichoqlab qo‘ydi, deya xabar bermoqda Tergov departamenti.

Qayd etilishicha, 2021-yilning 1-may kuni soat 23:30 larda voyaga yetmagan 14 yoshli X.I. Shayxontohur tumani “Ilg‘or” mahallasida joylashgan jamoat joyi hisoblangan Aviachipta binosining orqa tomonida bo‘la turib, 22 yoshli A.O.ga u bilan ikki kun oldin salomlashmaganini, uni yosh bola ko‘rganini vaj qilib, hech bir sababsiz chap qo‘ltiq sohasiga bir marotaba pichoq bilan urib, jarohat yetkazgan.

Mazkur holat yuzasidan Shayxontohur tumani bo‘yicha IIO FMB huzuridagi Tergov bo‘linmasi tomonidan X.I.ga nisbatan Jinoyat kodeksining 277-moddasi 2-qismi “v” bandi (bezorilik) bilan jinoyat ishi qo‘zg‘atilib, protsessual tartibda ushlangan.

Hozirda tergov harakatlari olib borilmoqda.

Bundan avval Qoraqalpog‘istonda mast holdagi 57 yoshli erkak xotini va 18 yoshli qizini o‘ldirib qo‘ygani, Navoiyda 30 yoshli aqli zaif fuqaro onasini pichoqlab o‘ldirgani hamda Farg‘onada 19 yoshli yigit uni mazax qilib, spirtli ichimlik olib berishga majburlagan ikki mast erkakni pichoqlagani haqida xabar berilgandi.