Профессионал бокснинг супер ярим ўрта вазн тоифасида ҳаракат қилаётган ўзбекистонлик Исроил Мадримов (8-0, 5 КО) 17 декабрь куни Тошкентда бўлиб ўтган бокс кечасининг асосий жангида Мишел Сорога (35-3-1, 24 КО) қарши жанг ўтказди.
Боксчилар ўртасидаги жангнинг дастлабки ярмида рингда тенг кураш кечди. Ҳар икки боксчи ҳам навбати билан кучли зарбаларни йўллади.
7 ва 8-раундларда Исроил нисбатан устунлик қилган бўлса, 9-раундга келиб, Соро яна фаоллашди. Бироқ 9-раунд сўнгида тушунарсиз вазият юзага келди: Исроил бир қатор кучли зарбалар берди ва Сорони қийин вазиятга тушириб қўйди. Ушбу вазиятда ҳакам раунд тугаганини англатувчи бонгни эшитмай қолди ва белгиланган вақт ўтса ҳам жангни тўхтатмади ҳамда Исроилнинг нокаутли ғалабасини қайд этди. Шундан сўнг жанг ташкилотчилари узоқ давом этган муҳокамалардан сўнг Исроилнинг техник нокаут билаҳ ғалаба қозонганини эълон қилди.
Шу тариқа Исроил Мадримов ушбу ғалабадан кейин WBA Super камари учун мажбурий даъвогарга айланди. WBA Super камари айни дамда Жермелл Чарлога (34-1-1, 18 КО) тегишли ҳисобланади.
Исроил учун бу проф боксдаги кетма-кет 8-ғалаба бўлди. Мадримов охирги жангини шу йилнинг 3 апрель санасида Тошкентда ўтказилган бокс оқшомида конголик енгилмас спортчи Эммани Каломбога қарши ўтказиб, очколар эвазига ғалаба қозонганди.
Шу тариқа Тошкентда ўтган навбатдаги бокс кечаси ўз ниҳоясига етди. Мусобақада рингга кўтарилган 7 нафар ўзбекистонлик боксчининг барчаси ғалабага эришди.
Дилшод Рўзметов россиялик боксчини мағлуб этиб, профессионал боксдаги илк ғалабасини қўлга киритди, Иқболжон Холдоров беларуслик боксчини нокаутга учратди, Элнур Абдураимов ҳам нокаут эвазига ғалаба қозонди. Бектемир Мелиқўзиев тўлиқ давом этган жангда 36 ёшли россиялик боксчини мағлуб этди, Ҳасанбой Дўстматов мексикалик боксчини муддатидан аввал мағлубиятга учратди. Шаҳрам Ғиёсов эса аргентиналик боксчи устидан қийин ғалабага эришди.
Изоҳ (0)