Навоийда табиий газдан ноқонуний фойдаланиб келган иссиқхоналардан бири аниқланди. Бу ҳақда «Ҳудудгаз Навоий» газ таъминоти филиали матбуот хизмати хабар берди.
Маълум қилинишича, «Ҳудудгаз Навоий» газ таъминоти филиалининг юридик шахсларга табиий газни етказиб беришни назорат қилиш ҳамда моддий ресурслардан оқилона фойдаланиш ва Коррупцияга қарши сиёсатни амалга ошириш бўлимлари, шунингдек, «Ҳудудгаз Метрология» филиали Навоий бўлими масъул ходимларининг истеъмолчиларнинг табиий газдан фойдаланиш ҳолати бўйича профилактик тадбирлари давом этмоқда.
Ана шундай тадбирлардан бири 13 декабрь куни Навоий шаҳридаги «НИ» МЧЖга қарашли иссиқхонада ўтказилган. Тадбир жараёнида мазкур объектда табиий газ тармоғига газ истеъмолини ҳисобга олиш прибори ўрнига ўзбошимчалик билан «катушка» (икки томони фляцли қувур) орқали уланиб, табиий газдан фойдаланиб келинаётгани маълум бўлган.
Истеъмолчи табиий газдан ноқонуний фойдаланиши оқибатида таъминот корхонаси жами 226 миллион 560 минг сўм зарар кўрган. Яъни иситиш мавсумида ўртача 11 300 та хонадоннинг бир кунлик истеъмоли учун етадиган табиий газ ҳисобга олинмай сарф қилинган.
Таъкидланишича, мазкур ҳолат бўйича барча ҳужжатлар ҳуқуқни муҳофаза қилиш органларига топширилади.
Аввалроқ Самарқанд вилоятидаги газ заправка 5,4 млрд сўмлик газ ўғирлагани аниқлангани, Навоийда оҳак ишлаб чиқариш корхонаси газдан ноқонуний фойдаланиб, 295 млн сўм зарар етказгани тўғрисида хабар берилганди.
Изоҳ (0)