Тирноқлар билан боғлиқ муаммоларни бартараф қилиш учун нималар қилиш кераклиги ҳақида маълумот берамиз.
Биотин қабул қилинг
B гуруҳи витаминлари қаторига кирадиган биотин тирноқ ва сочлар мустаҳкамлиги, асаб тизимининг тўғри фаолияти учун жавоб беради. Тухум, ясмиқ, сардина (балиқ тури)да биотин бисёр бўлади. Ё бўлмаса шифокор билан маслаҳатлашиб, ушбу витаминни биологик қўшимча сифатида қабул қилса ҳам бўлади.
Сувдан камроқ фойдаланинг
Кўп сув тегиши оқибатида тирноқлар мўртлаша бошлайди. Шу сабаб ҳам сувдан камроқ фойдаланишга ҳаракат қилинг, уй юмушларини бажарганда резина қўлқоп кийишни унутманг.
Лак ва тирноқни парвариш қилувчи воситалар таркиби билан танишинг
Ҳамиша лак ва тирноқни парвариш қилувчи воситалар таркибини ўқиб чиқишни эсингиздан чиқарманг. Гап шундаки, кимёвий воситалар тирноқ пластинасига зарар етказиши мумкин.
Тирноқларга дам беринг
Бир муддат лак ва шеллакциз юриб, тирноқларга дам беринг. Акс ҳолда тирноқларингиз синувчан ва мўрт бўлиб қолади.
Ёғ билан озиқлантиринг
Кокос, зайтун ва канакунжут ёғи тирноқ пластинасини мустаҳкамлаб, унинг атрофидаги терини намлантиради. Шу сабаб ҳам илиқ ёғ билан ванна қилиш тавсия этилади. Муолажа самарали бўлиши учун пахтадан тикилган қўлқоп кийиб ухлаш айни муддао.
Намлантиришни унутманг
Кун давомида турли муаммолар кузатилмаслигини истасангиз, тирноқ атрофидаги терини мунтазам равишда намлантириб туришни унутманг.
Витаминларни канда қилманг
C витамини тирноқларни мустаҳкамлаб, ўсишини жадаллаштиргани сабаб ҳам уларни лимон бўлаги билан артиш маслаҳат берилади. 5 дақиқа давом этадиган ушбу муолажадан кейин қўлларни илиқ сувда ювиб ташланг.
Озиқлантириш
Тирноқлар мустаҳкамлиги учун микроэлементларнинг кони бўлган қуйидаги маҳсулотларни канда қилмаслик керак.Гўшт ва бошқа оқсилга бой маҳсулотлар. Оқсил тирноқ пластинаси мустаҳкамлигини таъминлайди.
Барра мева ва сабзавотлар. Витамин ва минералларнинг кони ҳисобланган мева-сабзавотлар тирноқ, тери ва соч саломатлигини таъминлайди.
Қовоқ уруғи ва қора шоколад таркибидаги магний тирноқларда доғ пайдо бўлишининг олдини олади.
Балиқ ва денгиз маҳсулотлари таркибидаги рух моддаси тирноқлар мустаҳкам бўлишида муҳим рол ўйнайдиган оқсил ишлаб чиқарилишида иштирок этади.
Винодан фойдаланинг
1 чой қошиқ туз қўшилган 200-250 мл виноли аралашмадан тирноқларни ванна қилишда фойдаланса бўлади. Бунинг учун винони 30-35 даражада илитишингиз керак бўлади. Шундан кейин қўлларни илиқ сувда ювиб, терига намлантирувчи крем суртиш керак.
Изоҳ (0)