Шавкат Мирзиёев гидроэнергетикани ривожлантириш тўғрисидаги қарорни имзолади

Президент Шавкат Мирзиёев 10 декабрь куни «Гидроэнергетикани янада ривожлантириш бўйича қўшимча чора-тадбирлар тўғрисида»ги қарорни имзолади.

Ҳужжат билан республикада гидроэнергетикани янада ривожлантириш, мавжуд гидросалоҳиятдан унумли фойдаланишнинг асосий муҳим йўналишлари белгилаб олинган. Хусусан:

• электр энергетика соҳасида экологик тоза энергия манбаларидан кенг фойдаланиш ҳисобига изчил янги қувватлар ташкил этишни жадаллаштириш ҳамда амалдаги ишлаб чиқариш қувватларини босқичма-босқич модернизация қилиш орқали 2030 йилда республикадаги гидроэлектр станциялари қувватини 3416 мегаваттга (+66,5 фоиз) етказиш;
• хусусий сектор ва аҳолини табиий сув оқимларидан фойдаланган ҳолда электр энергиясини ишлаб чиқариш учун кенг жалб этиш, уларни давлат томонидан қўллаб-қувватлаш ва рағбатлантириш, ягона электр энергетикаси тизимига кафолатли уланишини таъминлаш, ишлаб чиқилган электр энергиясини кафолатли харид қилиш тизимини яратиш.

Қарор билан инвестиция лойиҳаларининг рўйхати, хусусий сектор иштирокида кичик гидроэлектр станцияларини қуриш таклиф этилаётган лойиҳалар рўйхати, 2022—2025 йилларда кооперация асосида маҳаллийлаштириш учун таклиф этилаётган кичик гидроэлектр станцияларини қуришга оид 2021—2030 йилларда гидроэнергетикани янада ривожлантириш бўйича қўшимча чора-тадбирлар дастури ҳам тасдиқланган.

Шунингдек, Энергетика вазирлигига халқаро таржибадан келиб чиқиб уч ой муддатда қонунчиликка қуйидагиларни назарда тутувчи ўзгартириш ва қўшимчалар киритиш бўйича таклифларни Вазирлар Маҳкамасига киритиш вазифаси юкланган:

• Ўрнатилган қуввати 0,5 мегаваттгача бўлган гироэлектр станцияларини — микро, 5 мегаваттгача бўлган гидроэлектр станцияларини — кичик, 30 мегаваттгача бўлган гидроэлектр станцияларини — ўрта, 30 мегаваттдан юқори бўлган гидроэлектр станцияларини — йирик гирдоэлектр станциялари таснифига киритиш ҳамда ушбу гидроэлектр станцияларини қайта тикланувчи энергия манбалари деб ҳисоблаш;
• Микро ва кичик гидроэлектр станцияларини (сув йиғиш иншоотларини қуришни кўзда тутмаган ҳолда) давлат-хусусий шериклик ҳамда бозор тамойили асосида ташаббус билдирган хусусий инвесторлар томонидан қуриш.

2022 йил 1 январдан бошлаб «Ўзбекгидроэнерго» АЖ таркибидаги гидроэлектр станциялари томонидан ишлаб чиқариладиган электр энергияси фаолият турига кўра кафолатланган тарзда давлат томонидан электр энергиясини харид қилувчи функцияси (ваколати) берилган орган томонидан қўшилган қиймат солиғини ҳисобга олган ҳолда II тариф гуруҳи истеъмолчилари учун белгиланган тарифга нисбатан:

• Сув оқими бўйича ишлайдиган гидроэлектр станцияларида — 70 фоиз миқдорда;
• Электр энергетикаси тизимининг режимига боғлиқ ҳолда диспетчер томонидан тартибга солинадиган, ростловчи гидроэлектр станцияларида — 100 фоиз миқдорда;
• Гидротўплаш электр станцияларида — 150 фоиз миқдорда сотиб олинади.

Бундан ташқари, давлат томонидан электр энергиясини харид қилувчи функцияси (ваколати) берилган орган томонидан электр энергиясини янги ишга тушириладиган қуёш, шамол, биогаз электр станцияларидан (бундан саноат кўламидаги 1 мегаватт ёки ундан ортиқ қувватлар мустасно), қуввати 5 мегаваттгача бўлган гидроэлектр станцияларидан ўз эҳтиёжлари учун ишлаб чиқарилгандан ортиқча электр энергиясини кафолатланган тарзда сотиб олиш II гуруҳ истеъмолчилари учун белгиланган тарифнинг 80 фоизи миқдорида амалга оширилади.Ҳужжатга мувофиқ хусусий инвесторлар қуввати 1 мегаваттгача бўлган қуёш, шамол, биогас ва қуввати 5 мегаваттгача бўлган гидроэлектр станцияларида ишлаб чиқарилган электр энергиясини юридик ва жисмоний шахсларга ягона электр энергетикаси тизимига уланмаган ҳолда, локал тармоқ қуриш орқали шартнома асосида ўзаро келишилган нархларда тўғридан-тўғри етказиб бериш ҳуқуқига эга.

Аввалроқ яқин беш йил ичида Ўзбекистонда умумий қуввати 740 мегаватт бўлган 21 та йирик ГЭСларни қуриш режалаштирилаётгани тўғрисида хабар берилганди. 2017 йилда Президент фармони билан «Ўзбекгидроэнерго» акциядорлик жамияти ташкил этилган эди. Ўтган даврда 11 та янги гидроэлектр станцияси қурилиб, 8 таси модернизация қилинди. Натижада 244 мегаваттлик қўшимча қувват яратилди.

ГЭС лойиҳалари бўйича асосий пудратчилар «To‘palang HPD Ҳолдинг» таркибига кирувчи компаниялар ҳисобланади. Унинг директори ва асосчиси «Ўзбекгидроэнерго» раҳбарининг ўғли.