БМТ Қочқинлар ишлари бўйича олий комиссари бошқармасининг гуманитар юки ортилган иккита махсус юк машинаси 15 декабрь куни Термиз орқали Афғонистоннинг Мозори Шариф шаҳрига жўнатилди, деб хабар бермоқда Сурхондарё вилояти ҳокимлиги матбуот хизмати.
Қайд этилишича, Афғонистонга юборилган дастлабки 40 тоннага яқин гуманитар юк ошхона анжомлари, пластмасса қоплама ва бошқа зарур ҳаётий нарсалардан иборат бўлиб, БМТ Қочқинлар ишлари бўйича олий комиссари бошқармасининг Сурхондарё вилоятидаги Termez Cargo Centre’да Ўзбекистон ҳукумати кўмагида ташкил этилган гуманитар марказидан юкланган.
Ўзбекистон—Афғонистон чегарасидан икки километр узоқликда жойлашган ушбу терминалга гуманитар ёрдам юклари октябрь—ноябрь ойларида ҳаво ва қуруқлик орқали етказилганди.
«Биз БМТнинг Қочқинлар бўйича олий комиссарлиги энг зарур пайтда тезкор инсонпарварлик ёрдамини кўрсатишида Ўзбекистон ҳукумати ва Термиздаги маҳаллий ҳамкорлар томонидан кўрсатилаётган доимий кўмакни қадрлаймиз. Эндиликда миллионлаб афғонлар озиқ-овқат таъминоти йўқлиги муаммосига дуч келаётгани ва қаҳратон қишдан омон қолиш учун ўта заиф бўлиб қолган бир пайтда, одамлар ҳаётини сақлаб қолиш ва гуманитар инқирознинг олдини олиш учун шошилинч ёрдам талаб этилади», — деган БМТ Қочқинлар бўйича олий комиссарлигининг алоқалар бўйича катта маслаҳатчиси Франк Ремус.
Эслатиб ўтамиз, 14 сентябрь куни Ўзбекистон Афғонистонга турли озиқ-овқат маҳсулотлари, бирламчи зарур товарлар, дори-дармонлар, кийим-кечак ва пойабзаллардан иборат инсонпарварлик ёрдами юборганди.
Мавзуга доир:
- «Афғонистондаги вазият бўйича қуруқ сўздан амалий ишларга ўтиш вақти келди» — Абдулазиз Комилов
- Шавкат Мирзиёев: «Мувофиқлаштирилган самарали чоралар кўрилмаса, Афғонистон узоқ вақт минтақавий хавфсизликка янги таҳдидлар манбаси бўлиб қолиши мумкин»
- «Афғонистонни яккалаб, уни муаммолар гирдобига ташлаб қўйиш мумкин эмас» — Шавкат Мирзиёев БМТ Бош Ассамблеясида Афғонистон муаммоси ҳақида гапирди
Изоҳ (0)