Ички ишлар вазири матбуот котиби Шоҳрух Ғиёсов Каттақўрғон туманида 2021 йилнинг 10 июнига ўтар кечаси ҳудудий Давлат солиқ инспекцияси бошлиғи ўринбосари, 41 ёшли Азизбек Аҳмедовнинг йўл ҳаракати хавфсизлиги хизмати ходимларининг машинасида вафот этганидан сўнг ИИВ баёноти билан бирга ҳолат тасвирга олинган бодикамерадаги видеоларнинг кесиб ташлангани бўйича ўз фикрини билдирди. Бу ҳақида «Дарё» мухбири Фарҳод Норбўтаев хабар бермоқда.
«Каттақўрғондаги ҳолат бўйича айтадиган бўлсам, ходимлар у ерда ўз вазифасини бажараётган бўлган. Фуқаро ҳақиқатан ҳам ичган. У ходимларимизнинг бўғиб ўлдириши оқибатида вафот этмаган. Ходимларнинг қонуний талабига бўйсунмаганидан кейин куч ишлатишга мажбур бўлган.
Куч ишлатишнинг даражасига баҳо берилган ва ходимлар ўз хизмат ваколати доирасидан ташқарига чиқишган. Иш судда ҳам кўрилиб, уларнинг ҳаракатига суд ҳуқуқий баҳони берди.
Видеонинг кесилиш мақсади, ниманидир кўрсатмаслик эмас, шунчаки роликни қисқартириш бўлган. Сабаби, катта видеони кўриш ноқулай. Қолаверса, бизларнинг мақсадимиз, айнан қаерда қонунбузарлик содир қилган бўлса ўша жойларни кўрсатиб бериш.
Балки шу жойини бизлар нотўғри қилгандирмиз. Мана кўпчилик гапирди видеонинг кесилган жойини. Балки бошқачароқ кўрсатиш керак эди. Энди бу ҳам ахборотни етказишдаги камчиликлар бўлиши мумкин. Бизлар ҳам кўп нарсани энди ўрганяпмиз», – дейди Шоҳрух Ғиёсов.
Эслатиб ўтамиз, Самарқанд вилоятининг Каттақўрғон туманида 10 июнга ўтар кечаси ҳудудий Давлат солиқ инспекцияси бошлиғи ўринбосари, 41 ёшли Азизбек Аҳмедов йўл ҳаракати хавфсизлиги хизмати ходимларининг машинасида вафот этганди.
Ички ишлар вазирлигининг 11 июндаги баёнотида Аҳмедов ЙПХ ходимлари томонидан ушланиб, «ўта маст ҳолатда бўлгани гумон қилиниб, тиббий кўрикдан ўтиш учун таклиф қилинганида фуқаро ички ишлар органлари ходимларининг қонуний талабларини бажармасдан, фаол қаршилик кўрсата бошлагани, шу вақт оралиғида тиббий кўрикка олиб бориш учун транспорт воситасига ўтқазилган фуқаронинг соғлиғи ёмонлашиб, воқеа жойига тез тиббий ёрдам хизмати чақиртирилгани, бироқ кўрсатилган муолажаларга қарамай, фуқаро Азизбек Аҳмедов вафот этгани» таъкидланади.
ИИВ баёнот билан бирга, ҳолатнинг бодикамерада олинган видеосини ҳам эълон қилганди.
Мазкур ҳолат юзасидан Каттақўрғон туман прокуратураси томонидан Жиноят кодексининг 206-моддаси (ҳокимият ёки мансаб ваколати доирасидан четга чиқиш) аломатлари билан жиноят иши қўзғатилган ва 3 декабрь куни жиноят ишлари бўйича Каттақўрғон туман суди қарори билан судланувчилар Меҳриддин Кучкаров ва Шаҳбоз Раҳимбердиев 2 йил ички ишлар органларида ишлаш ҳуқуқидан маҳрум қилиниб, уларнинг ҳар бирига 2 йил 10 ой муддатга озодликдан маҳрум қилиш жазоси тайинланган.
Изоҳ (0)