Ichki ishlar vaziri matbuot kotibi Shohrux G‘iyosov Kattaqo‘rg‘on tumanida 2021-yilning 10-iyuniga o‘tar kechasi hududiy Davlat soliq inspeksiyasi boshlig‘i o‘rinbosari, 41 yoshli Azizbek Ahmedovning yo‘l harakati xavfsizligi xizmati xodimlarining mashinasida vafot etganidan so‘ng IIV bayonoti bilan birga holat tasvirga olingan bodikameradagi videolarning kesib tashlangani bo‘yicha o‘z fikrini bildirdi. Bu haqida “Daryo” muxbiri Farhod Norbo‘tayev xabar bermoqda.
“Kattaqo‘rg‘ondagi holat bo‘yicha aytadigan bo‘lsam, xodimlar u yerda o‘z vazifasini bajarayotgan bo‘lgan. Fuqaro haqiqatan ham ichgan. U xodimlarimizning bo‘g‘ib o‘ldirishi oqibatida vafot etmagan. Xodimlarning qonuniy talabiga bo‘ysunmaganidan keyin kuch ishlatishga majbur bo‘lgan.
Kuch ishlatishning darajasiga baho berilgan va xodimlar o‘z xizmat vakolati doirasidan tashqariga chiqishgan. Ish sudda ham ko‘rilib, ularning harakatiga sud huquqiy bahoni berdi.
Videoning kesilish maqsadi, nimanidir ko‘rsatmaslik emas, shunchaki rolikni qisqartirish bo‘lgan. Sababi, katta videoni ko‘rish noqulay. Qolaversa, bizlarning maqsadimiz, aynan qayerda qonunbuzarlik sodir qilgan bo‘lsa o‘sha joylarni ko‘rsatib berish.
Balki shu joyini bizlar noto‘g‘ri qilgandirmiz. Mana ko‘pchilik gapirdi videoning kesilgan joyini. Balki boshqacharoq ko‘rsatish kerak edi. Endi bu ham axborotni yetkazishdagi kamchiliklar bo‘lishi mumkin. Bizlar ham ko‘p narsani endi o‘rganyapmiz”, – deydi Shohrux G‘iyosov.
Eslatib o‘tamiz, Samarqand viloyatining Kattaqo‘rg‘on tumanida 10-iyunga o‘tar kechasi hududiy Davlat soliq inspeksiyasi boshlig‘i o‘rinbosari, 41 yoshli Azizbek Ahmedov yo‘l harakati xavfsizligi xizmati xodimlarining mashinasida vafot etgandi.
Ichki ishlar vazirligining 11-iyundagi bayonotida Ahmedov YPX xodimlari tomonidan ushlanib, “o‘ta mast holatda bo‘lgani gumon qilinib, tibbiy ko‘rikdan o‘tish uchun taklif qilinganida fuqaro ichki ishlar organlari xodimlarining qonuniy talablarini bajarmasdan, faol qarshilik ko‘rsata boshlagani, shu vaqt oralig‘ida tibbiy ko‘rikka olib borish uchun transport vositasiga o‘tqazilgan fuqaroning sog‘lig‘i yomonlashib, voqea joyiga tez tibbiy yordam xizmati chaqirtirilgani, biroq ko‘rsatilgan muolajalarga qaramay, fuqaro Azizbek Ahmedov vafot etgani” ta‘kidlanadi.
IIV bayonot bilan birga, holatning bodikamerada olingan videosini ham e’lon qilgandi.
Mazkur holat yuzasidan Kattaqo‘rg‘on tuman prokuraturasi tomonidan Jinoyat kodeksining 206-moddasi (hokimiyat yoki mansab vakolati doirasidan chetga chiqish) alomatlari bilan jinoyat ishi qo‘zg‘atilgan va 3-dekabr kuni jinoyat ishlari bo‘yicha Kattaqo‘rg‘on tuman sudi qarori bilan sudlanuvchilar Mehriddin Kuchkarov va Shahboz Rahimberdiyev 2 yil ichki ishlar organlarida ishlash huquqidan mahrum qilinib, ularning har biriga 2 yil 10 oy muddatga ozodlikdan mahrum qilish jazosi tayinlangan.
Izoh (0)