Ноябрь бошларида Тошкентнинг Чилонзор туманида жойлашган ҳарбий шаҳарча 204,9 миллиард сўм бошланғич нарх билан аукционга қўйилгани тўғрисида хабар берилганди. «E-auksion» маълумотларига кўра, ушбу объект онлайн аукционда 266,4 миллиард сўмга сотилган.
Давлат активларини бошқариш агентлиги томонидан онлайн аукционга қўйилган ушбу объект 27,86 гектар ҳудудни эгаллаган, ундаги бино ва иншоотларнинг умумий майдони 29,8 минг квадрат метрга тенг. Барча коммуникация — электр энергияси, газ, сув таъминоти ва канализация мавжуд. Объект ҳудудида қоровулхона, бир нечта бостирма, ошхона, маъмурий бино, омборхона, устахона, гараж, резервуарлар жойлашган.
Бошланғич нархи 204 миллиард сўм бўлган давлат мулки 1 соат 23 дақиқа давом этган савдода 15 қадам нархи оширилиб, 266,4 миллиард сўмга сотилган. Савдода «Do‘mbrobod city group» МЧЖ ғолиб ва Build power МЧЖ резерв ғолиб деб топилган.
Шаффоф ўтган онлайн аукционни ‘E-auksion.uz’ платформасидан рўйхатдан ўтмасдан туриб ҳам тўғридан-тўғри кузатиб бориш имконияти яратилди», — дейилади хабарда.
Telegram’даги «Давлетовуз» канали муаллифининг ёзишича, «Do‘mbrobod city group» МЧЖ 2021 йилнинг 2 декабрь куни 1 триллион сўм устав капитали билан очилган.
Аввалроқ Ўзбекистон Мудофаа вазирлигининг фойдаланилмаётган автомототранспортлари сотувга қўйилиши, Навоийда олтин конлари бўлган 2 ҳудуд 190 млн бошланғич нарх билан аукционга қўйилгани тўғрисида хабар берилганди.
Изоҳ (0)