«2022 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисида»ги президент фармони лойиҳасига кўра, ўзбекистонликларга Янги йил байрамида кетма-кет 5 кун дам берилиши мумкин. Бу ҳақда Telegram’даги «Меҳнат ҳуқуқи» канали хабар берди.
Ўзбекистон президентининг 2021 йил 10 майдаги 6222-сон фармони билан 31 декабрь — жума қўшимча дам олиш куни этиб белгиланган. Меҳнат кодекси 131-моддасига кўра, 1 январь — Янги йил байрам (ишланмайдиган) куни. 2 январь эса якшанба дам олиш куни.
2022 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисидаги президент фармони лойиҳаси ишлаб чиқилган бўлиб, унда 2022 йил 3 январь — душанба, 4 январь — сешанба қўшимча дам олиш куни этиб белгиланиши кўзда тутилмоқда. Ҳужжат қабул қилинса, ўзбекистонликлар Янги йил байрами муносабати билан кетма-кет 5 кун (31 декабрдан 4 январгача) дам олади.
Хусусан:
- 2021 йил 31 декабрь (жума) – 2021 йил 10 майдаги ПФ-6222-сонли президент фармонига асосан қўшимча дам олиш куни;
- 2022 йил 1 январь (шанба) – Меҳнат кодекси 131-моддасига кўра, ишланмайдиган кун (Янги йил байрами);
- 2022 йил 2 январь — якшанба дам олиш куни;
- 2022 йил 3 январь (душанба) ва 4 январь (сешанба) кунлари – қабул қилиниши кутилаётган фармонга асосан қўшимча дам олиш куни.
Изоҳ (0)