Ижтимоий тармоқларда, хусусан, вилоят, туман, шаҳар ҳокимларининг янги қарорлари ҳақида маълумот берувчи «Ҳоким қарори» Telegram каналида ҳоким ёрдамчиларининг янги иш формаси сурати эълон қилинди.
Янги форма деб аталаётган кийимнинг юқори қисми ва шими бир хил – тўқ кўк рангда. Кийимнинг ўнг кўкрак ва чап елка қисмида «Ҳоким ёрдамчиси» ёзуви ҳамда махсус белгиси жойлаштирилган.
Формага қўшимча равишда кийим рангида портфел ҳам берилган. Портфелда ҳам «Ҳоким ёрдамчиси» ёзувини кўриш мумкин.
Ҳоким ёрдамчилари айнан шу формада иш бошлаши ҳақида ҳали расмий маълумот берилмади.
Аввалроқ 2022 йилнинг 1 январидан республиканинг 9 минг 259 та маҳалласида ҳоким ёрдамчилари иш бошлаши маълум қилинганди. Фармонга мувофиқ, ҳоким ёрдамчиларининг ойлик иш ҳақи миқдори улар бириктирилган маҳалладаги хонадонлар сонига мутаносиб равишда белгиланади.Мазкур лавозимга:
- Иқтисодий тараққиёт ва камбағалликни қисқартириш, Молия, Бандлик ва меҳнат муносабатлари, Инвестициялар ва ташқи савдо вазирликлари, Давлат солиқ қўмитаси, тижорат банклари, иқтисодий ва инвестиция комплексларига кирувчи бошқа идоралар, уларнинг ҳудудий бўлинмаларида бўлим (шўъба) бошлиғидан паст бўлмаган лавозимда ишловчи раҳбар ходимлар, шунингдек, маҳаллий ҳокимликларнинг раҳбар ходимлари тайинланади.
- Номзодлар очиқ танловлар асосида ишга қабул қилинади.
- Тадбиркорлар, бошқа соҳа вакиллари, фаол ёшлар, раҳбарлик лавозимида фаолият юритмаётган ходимлар ва олий маълумотга эга бўлмаган фуқаролар ҳам ишга қабул қилиниши мумкин.
Изоҳ (0)