Президент Шавкат Мирзиёев бошчилигида ўтказилаётган видеоселектор йиғилишида эндокрин касалликларни барвақт аниқлаш бўйича алоҳида дастур қабул қилиниши айтилди. Йиғилишда унинг доирасида жорий этиладиган янгиликлар маълум қилинди, дея хабар бермоқда «Дарё» мухбири.
2022 йилдан 40 ёшдан ошган барча аҳоли (10 миллион нафар) йилига камида бир марта манзилли эндокрин скринингдан ўтказилади. Бунинг учун, тиббиёт бригадалари ва поликлиникаларнинг 14 мингдан зиёд оилавий ва таълим муассасаларининг шифокорлари эндокрин касалликларни аниқлаш ва бирламчи ёрдам кўрсатишга ўқитилади. Ҳар бир тиббиёт бригадаси экспресс-тестлар ўтказиш учун глюкометр билан таъминланади.
Президент, шунингдек, эндокрин касалликлар аниқланган аҳолининг ягона электрон реестри ишга туширилиши, 2022 йилнинг 1 июлидан 2 миллион нафар аёллар, 3–15 ёшдаги болалар ёд препарати билан бепул таъминланишини билдирди.
«Қандли диабет учун метформин дорилари 200 мингдан зиёд эҳтиёжманд аҳолига бепул тарқатилади (маҳаллий метформин нархи – 8 минг сўм). Масалан, беморларга метформин дорисини бериш уларда қандли диабет ривожланишини 10 йилга кечиктиради», – дейди Президент.
Бундан ташқари, болалар ва катталарни одам инсулини билан бепул таъминлаш дастури давом эттирилиши, илк бор 25 ёшгача бўлган ёшларга аналогли инсулин берилиши айтилди. Маълумот учун, бугунги кунда аналогли инсулин фақат болаларга бепул тарқатилаётган бўлиб, 18 ёшдан кейин одам инсулинига ўтказилмоқда. Лекин диабети бор ёшлар организмини бенуқсон шаклланиши учун аналогли инсулинни 25 ёшгача бериш зарур.
ССВ ва Молия вазирликларига вилоят ҳокимлари билан бирга, бир ой муддатда давлат ҳисобидан диабетик дори воситаларини шаффоф тарзда харид қилиш, уларни ташиш ва сақлаш талабларига қатъий амал қилган ҳолда, ҳар бир беморга етказиш бўйича тизим яратиш вазифаси юклатилди.
Изоҳ (0)