Ijtimoiy tarmoqlarda, xususan, viloyat, tuman, shahar hokimlarining yangi qarorlari haqida ma’lumot beruvchi “Hokim qarori” Telegram kanalida hokim yordamchilarining yangi ish formasi surati e’lon qilindi.
Yangi forma deb atalayotgan kiyimning yuqori qismi va shimi bir xil – to‘q ko‘k rangda. Kiyimning o‘ng ko‘krak va chap yelka qismida “Hokim yordamchisi” yozuvi hamda maxsus belgisi joylashtirilgan.
Formaga qo‘shimcha ravishda kiyim rangida portfel ham berilgan. Portfelda ham “Hokim yordamchisi” yozuvini ko‘rish mumkin.
Hokim yordamchilari aynan shu formada ish boshlashi haqida hali rasmiy ma’lumot berilmadi.
Avvalroq 2022-yilning 1-yanvaridan respublikaning 9 ming 259 ta mahallasida hokim yordamchilari ish boshlashi ma’lum qilingandi. Farmonga muvofiq, hokim yordamchilarining oylik ish haqi miqdori ular biriktirilgan mahalladagi xonadonlar soniga mutanosib ravishda belgilanadi.Mazkur lavozimga:
- Iqtisodiy taraqqiyot va kambag‘allikni qisqartirish, Moliya, Bandlik va mehnat munosabatlari, Investitsiyalar va tashqi savdo vazirliklari, Davlat soliq qo‘mitasi, tijorat banklari, iqtisodiy va investitsiya komplekslariga kiruvchi boshqa idoralar, ularning hududiy bo‘linmalarida bo‘lim (sho‘ba) boshlig‘idan past bo‘lmagan lavozimda ishlovchi rahbar xodimlar, shuningdek, mahalliy hokimliklarning rahbar xodimlari tayinlanadi.
- Nomzodlar ochiq tanlovlar asosida ishga qabul qilinadi.
- Tadbirkorlar, boshqa soha vakillari, faol yoshlar, rahbarlik lavozimida faoliyat yuritmayotgan xodimlar va oliy ma’lumotga ega bo‘lmagan fuqarolar ham ishga qabul qilinishi mumkin.
Izoh (0)