Марказий банк Ўзбекистонга 2021 йилнинг январь—ноябрь ойларида хориждан юборилган пул ўтказмалари ҳажми 7,3 миллиард долларни ташкил этганини маълум қилди.
Қайд этилишича, пул ўтказмалари ҳажми 2020 йилнинг мос даврига нисбатан 35 фоизга ўсган. Бу аҳолининг истеъмол талабини қўллаб-қувватловчи омиллардан бўлган.
Европа тикланиш ва тараққиёт банки Ўзбекистонда ялпи ички маҳсулот ўсиши борасидаги прогнозларини оширганди. Унга кўра, ЯИМ 2021 йилда 6,8 фоизга, 2022 йилда эса 6 фоизга ўсади. Прогноз қилинаётган ўсиш хусусий истеъмол ва пул ўтказмаларининг кўпайиши ҳамда аксарият қисми ташқи қарзлар ҳисобидан молиялаштириладиган инфратузилмага инвестицияларнинг ортиши ҳисобига таъминланади.
Белгиланишича, Ўзбекистонга меҳнат мигрантларининг пул ўтказмалари ҳажми 2021 йил якунига келиб қарийб 7,6 миллиард долларни ташкил этиши кутилмоқда. Таққослаш учун, 2020 йил давомида мигрантлар Ўзбекистонга 6 миллиард доллар ўтказган.
Эслатиб ўтамиз, Ўзбекистонга 2021 йилнинг январь—сентябрь ойларида хориждан юборилган пул ўтказмалари ҳажми 5,7 миллиард долларни ташкил этганди.
Изоҳ (0)