Ўзбекистонлик MMA жангчиси Россияда махсус хизмат ходимлари билан муштлашгани ва ҳибсга олинганидан кейин полиция маҳкамасидан қочиб кетгани айтилмоқда

Ўзбекистонлик MMA жангчиси Бунёд Тўхтаев Россиянинг Санкт-Петербург шаҳри полиция бўлимидан қочиб кетди, дея хабар қилмоқда «Интерфакс».

Дастлабки маълумотларга кўра, 8 декабрь куни Тўхтаев экстремизмга қарши кураш маркази ходимларига нисбатан агрессив муносабатда бўлган. Яккакурашчи ходимлардан бирига зарба берган ва воқеа жойидан яширинишга уринган. Бироқ полиция уни қўлга олган ва маҳкамага олиб кетган.

Эртаси куни Бунёд полиция маҳкамасидан қочиб кетишга муваффақ бўлган.

Қайд этилишича, полиция 8 декабрь куни Тўхтаевни QR-код ва миграцион ҳужжатлар савдоси билан шуғулланганликда гумон қилиб, сўроқ остига олган. Ўша вақтда спортчи ва ҳуқуқни муҳофаза қилиш ходимлари ўртасида келишмовчилик юзага келган.

Бўлиб ўтган воқеалардан кейин унга «сохта ҳужжатларни тайёрлаш, сохталаштириш ёки айирбошлаш» ва «ҳукумат вакилига нисбатан куч ишлатиш» бандлари билан жиноят иши қўзғатилган. Айни вақтда Тўхтаев қидирувга берилган.

Аввалроқ Гуам оролида истиқомат қилувчи, асли ўзбекистонлик бўлган MMA жангчиси Акмал Ҳожиев вакцинация мавзусидаги тортишув сабаб ўз уйида шифокорни ўлдириб қўйгани хабар қилинганди.