Samarqandda tug‘ilgan MMA jangchisi Guamda shifokorning o‘limida ayblanib, hibsga olindi. Sportchi aybiga iqror bo‘lgan

Kelib chiqishi Samarqand shahridan bo‘lgan MMA jangchisi Akmal Hojiyev shifokorning o‘limida gumonlanib, hibsga olindi.

MMA Junkie’ning xabar qilishicha, Guam orolida istiqomat qiluvchi Akmal Hojiyev shifokor bilan koronavirusga qarshi vaksina borasidagi tortishuv sabab qotilga aylangan. Qayd etilishicha, Hojiyev ommaviy emlanishga qarshi bo‘lgan.

Xabarga ko‘ra, jangchi va shifokor Miran Ribati o‘zaro tanish bo‘lgan. Ular bitta mashg‘ulot zalida shug‘ullangan. Qotillik sportchining uyida sodir etilgan. Uning onasi va singlisi bunga guvoh bo‘lgan.

OAVning qayd etishicha, Hojiyev o‘zaro tortishuvdan keyin shifokorni bo‘g‘a boshlagan. Akmal Ribatiga usul qo‘llab, uni harakatsizlantirgan. Guvohlar politsiya chaqirgan va Hojiyevni to‘xtatishga uringan. Keyinchalik u oshxonadan tushlikdan qolgan suyakni olib, uni bir necha bor shifokorga sanchgan. Ribati shunda ham o‘rnidan turgan va qochishga uringan, biroq sportchi unga pichoq bilan hamla qilgan va Ribatni o‘ldirgan.

Politsiya voqea joyiga yetib kelgan, Hojiyev o‘sha zahoti aybini tan olgan.

Ta’kidlanishicha, sportchining ruhiy holatida muammolar bo‘lib turgan. Turli janjal va tortishuvlar sabab u ikkita jangchilar klubidan haydalgan.

Hojiyev professional MMA’da to‘rtta jang o‘tkazib, ularning uchtasida g‘alaba qozongan. U 2017-yilda o‘zbekistonlik Abdulaziz Jo‘raboyevni mag‘lub etgandi.