30 ёшли Мессиас «Милан»нинг қутқарувчисига айланмоқда. Бир неча йил аввал қора ишчи бўлган футболчи бу даражага қандай эришди?

27 ёшида профессионал футболга кириб келган Жуниор Мессиас сўнгги вақтларда «Милан»да асосий роллардан бирини бажармоқда. Мессиас Чемпионлар Лигасида гол урди, ундан сўнг А Серияда «Женоа» дарвозасини икки бор ишғол қилди.

«Милан» 2021 йилнинг ёзидаги трансфер ойнасини самарали якунлади: жамоага Темуэ Бакайоко («Челси»дан ижара), Петро Пеллегри («Монако»дан ижара) ва Яссин Адли («Бордо»дан харид қилинди ва дарҳол жамоанинг ўзига ижарага берилди).

Италияликлар ҳужум чизиғи учун ижодкор футболчи қидирди. Асосий номзод «Брест» футболчиси Ромен Февр бўлиб турганди, аммо трансфер амалга ошмади. Шундан сўнг «Милан» Алексей Миранчук борасида «Аталанта» билан боғланди, музокаралар ижобий бошланмади, уни давом эттиришга эса вақт йўқ эди.

«Милан» Б Серияга эътиборини қаратди. «Кротоне» жамоаси ҳужумчиси Жуниор Мессиас харид қилинди.

Бразилиялик тиббий кўрикдан ўтди ва клуб билан шартнома имзолади. Футболчи 5,4 миллион еврога сотиб олиш ҳуқуқи билан 2,6 миллион еврога ижара асосида жамоага келди.

2020/21 йилги мавсумда Жуниор Мессиас «Кротоне» сафида илк бор А Серияда ўйнаганди. Юқори дивизионда бразилиялик футболчи йўқолиб қолмади — 4-турда «Ювентус»га қарши баҳсда Мессиас ўйиннинг энг яхши футболчиси бўлди. Мавсум давомида ҳужумчи А Серияда 9 та гол урди ва 4 та голли узатмага муаллифлик қилди. У яхши футболчига айланди, лекин ҳаваскорларга хос беғуборликни йўқотмади. Италия чемпионатидаги ўйинларнинг бирида Мессиаснинг футболкаси йиртилиб кетади. Бошқа футболчилар дарҳол футболкасини алмаштиргани югуради, аммо Жуниор мато осилиб қолмаслиги учун уни тугун қилиб боғлади ва Италия чемпионати эмас, мактаб биринчилиги мусобақаси ўтказилаётгандек ўйнашда давом этди.

Жуниор бўйи икки метр келадиган нигериялик ҳужумчи Сими билан биргаликда «Кротоне» урган голларнинг ярмидан кўпига муаллифлик қилди (45 тадан 29 таси икки ҳужумчига тегишли).

Иккала ҳужумчи ҳам янги мавсумда А Серияда қолди («Кротоне» Б Серияга тушиб кетган бўлса ҳам): Нванкво «Салернитана»да, Мессиас эса «Милан»да.

Жуниорнинг ажралиб турадиган хислати — яхши техника. Кўчадаги ўйинлари сабаб дриблингчига айланганини ўзи ҳам тан олади.

Дриблинг — Бразилиядан, кўчадан ўрганилган. Мен профессионал жамоаларнинг академиясида шуғулланмаганман, шунчаки дўстларим билан вақт ўтказардим. Биз эркин эдик — ҳар ким ўзи хоҳлаган нарсасини қиларди. Шунинг учун финтлар фақатгина самарали эмас, фойдали ҳам бўлиши керак, деб ҳисоблардик. Футболнинг маъноси — ғалаба. Зиданни эслайман, унинг ўйин услуби менга жуда ёқарди. У хотиржам, самарали ва чиройли ҳаракат қиларди! Ҳозирги футбол — бу тактика, ёрқин футболчилар етишмайди. Футбол янада жозибалироқ бўлишини истардим.

Жуниор Мессиас

Мессиаснинг маҳоратидан кўра унинг босиб ўтган йўли қизиқроқ. Мессиас «Крузейрос» академиясида футболни ўргана бошлайди. Аммо асосий жамоага ўтиш унга насиб этмайди. 20 ёшида бразилиялик футболчи оиласини боқиш учун Италияга йўл олади. Акаси ундан аввалроқ Европага борган эди.

Мессиас Турин чеккасидаги Барреира ди Милано номли кварталга жойлашди. Қурилиш майдончасидан иш топиб, арзимас пулга вайрон бўлган бинолардан қолган ғиштларни тозаларди ва майдаларди. Футбол унинг хоббиси сифатида қолиб кетди. Кейин эса қурувчи бўлиб ишлади, ундан сўнг маиший техника савдоси билан шуғулланадиган компанияга ишга кирди, у ерда юк ташувчи ва курьерлик вазифаларини бажарди.

Дам олиш кунларида иммигрантлардан ташкил топган «Спорт Варик» ҳаваскорлар жамоасида тўп сурарди. Бош мураббий Эцио Росси жамоанинг ривожланишига ёрдам берди. Кейинчалик мутахассис «Казале» жамоасидан таклиф олади ва у Мессиасни ўзи билан бирга олиб кетади. Мураббий футболчи танлашда адашмаган эди: Жуниор 32 ўйинда 21 та гол уриб, жамоасининг Д Серияга қадар чиқишига ёрдам берди. Шу тариқа бразилияликнинг Италия футболидаги парвози бошланди. Жуниорни жамоадошлари Фигура (испанчада «юлдуз» деган маънони билдиради) деб атарди.

Мессиас Италия фуқаролигини олиш учун ҳаракат қиларди, тахминан ўша вақтларда Жуниорни профессионал клублар пайқай бошлади. Ҳужумчи 25 ёшида Д Серия, 27 ёшида C Серия, 28 ёшида Б Серияда ўйнади. 29 ёшида «Кротоне» билан биргаликда А Серияга чиқди. 30 ёшида эса «Милан»да пайдо бўлди.

Менинг ҳикоям нимани ўргатади? Ишонч доим кераклигини. Албатта, омад ҳам керак, лекин меҳнатсиз ҳеч нарсага эришиб бўлмайди. Ҳеч қачон ўзимни кучли ўйинчи деб ҳисобламаганман. Ундан ташқари бошқалардан ҳам ёмонроқ эканимга амин эдим. Шунинг учун кўпроқ шуғулланардим.

Жуниор Мессиас