ФИФА «Насаф» жамоасига тақиқ қўйди. Бу ҳақда ПФЛ матбуот хизмати маълум қилди.
2021 йилнинг 7 октябрида ФИФА Низоларни ҳал этиш палатаси «Насаф» клуби ва франциялик футболчи Абделае Диаките ўртасидаги низоли вазият юзасидан қарор чиқарганди. Унга кўра, «Насаф» футболчи билан тузилган шартнома шартларини бажармаган.
Шу сабабли футболчи ФИФАга мурожаат қилган ва якунда ташкилот белгиланган қарздорлик ва жарима тўловларини 45 кун мобайнида тўлаш мажбуриятини «Насаф» клуби зиммасига юклаган эди. Агар Қарши жамоаси ушбу мажбурият ўз вақтида бажарилмаса, клубга нисбатан миллий ва халқаро миқёсда янги футболчиларни рўйхатдан ўтказиш бўйича тақиқ қўйилиши ҳақида огоҳлантирилган.
2021 йил 9 декабрда «Насаф»га берилган муддат ўз якунига етди ва жамоага трансфер тақиқи қўйилди. Энди клуб қишки трансфер ойнасида янги футболчиларни харид қилиши учун мазкур низоли вазиятни ҳал этиши лозим бўлади.
2020 йил февраль ойида қаршиликлар матбуот хизмати Диакитенинг жамоа ўқув-йиғин машғулотларида қатнашаётгани ҳақида маълумот берганди. Француз «Насаф» жамоаси таркибида бирорта ўйинда майдонга тушмаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)